Hargreaves: Vendimi i Hagës nuk cenon shtetësinë e Kosovës, Mbretëria e Bashkuar do ta mbrojë të ardhmen e saj

Ambasadori i Mbretërisë së Bashkuar në Kosovë, Jonathan Hargreaves, qëndroi në kufirin në Han të Elezit, në vendin ku trupat britanike hynë në Kosovë në qershor të vitit 1999, me synim ndalimin e spastrimit etnik të nisur nga Serbia.

Në një postim të publikuar pas vizitës, ai kujtoi se politikat e Slobodan Millosheviqit sollën në Kosovë krime lufte dhe represion, të cilat janë dokumentuar gjerësisht. Hargreaves theksoi se qindra mijëra shqiptarë etnikë u detyruan të largoheshin nga vendi ose u zhvendosën brenda Kosovës.

Sipas ambasadorit, në qershor të vitit 1999 forcat britanike kaluan kufirin në Han të Elezit si pjesë e misionit të NATO-s, të autorizuar përmes Rezolutës 1244 të Këshillit të Sigurimit të OKB-së. Ai nënvizoi se Këshilli i Sigurimit, ku bënte pjesë edhe Rusia, kishte shprehur vazhdimisht shqetësim të thellë për gjendjen e rëndë humanitare në Kosovë.

Hargreaves shkroi se Millosheviqi i refuzoi të gjitha ofertat për paqe, duke çuar në përshkallëzimin e fushatës ajrore të NATO-s në vitin 1999 dhe ndërhyrjen e Aleancës në Kosovë.

Ambasadori britanik deklaroi se Mbretëria e Bashkuar është krenare për rolin e saj në Kosovë gjatë vitit 1999 dhe në periudhën pasuese. Ai tha se Londra vijon të mbështesë pa lëkundje drejtësinë ndërkombëtare, llogaridhënien dhe respektimin e vendimeve të gjykatave ndërkombëtare.

Ai vlerësoi gjithashtu vendimin e Kosovës për krijimin dhe mbështetjen e Dhomave të Specializuara, edhe pse ato mund të hetonin disa prej figurave më të njohura të organizatave që kishin rol qendror në luftën çlirimtare. Sipas tij, gatishmëria e Kosovës për të mbështetur parimin se askush nuk qëndron mbi ligjin është një shembull i rëndësishëm për gjithë rajonin.

Duke iu referuar vendimit të Hagës, Hargreaves sqaroi se dënimet e fundit lidhen me krime individuale të kryera ndaj viktimave nga komunitete të ndryshme. Ai theksoi se ato nuk përbëjnë në asnjë mënyrë një vlerësim mbi shtetësinë, sovranitetin apo të drejtën e Kosovës për të përcaktuar të ardhmen e saj, të cilën Mbretëria e Bashkuar do të vazhdojë ta mbrojë me forcë. Personat e dënuar, shtoi ai, kanë të drejtë t’i apelojnë vendimet.

Hargreaves deklaroi se Mbretëria e Bashkuar mbetet fuqimisht e angazhuar për të vërtetën mbi Ballkanin Perëndimor dhe për një pajtim të qëndrueshëm. Ai shtoi se vendi i tij do të vazhdojë bashkëpunimin me partnerët në të gjithë rajonin dhe me aktorët ndërkombëtarë, në mbështetje të paqes, drejtësisë dhe një të ardhmeje të begatë për të gjitha komunitetet.