Haradinaj: Opozita duhet të marrë postin e Presidentit ose të drejtojë Qeverinë

Ish-kryeministri Ramush Haradinaj deklaroi se partitë opozitare do ta ndihmonin Kosovën nëse do të bëheshin pjesë e një koalicioni me Lëvizjen Vetëvendosje, duke pasur rol të përbashkët në marrjen e vendimeve.

Ai vlerësoi se nuk është në interes të vendit që opozita të përfshihet vetëm në qeveri, pa pasur kontroll mbi një prej posteve që lidhen drejtpërdrejt me vendimmarrjen.

Haradinaj tha se Albin Kurti, nëse e sheh politikën nga një këndvështrim demokratik, duhet ta kuptojë rezultatin e zgjedhjeve si një kërkesë për bashkëvendimmarrje.

“Kurti po përpiqet ta poshtërojë opozitën duke i ofruar vetëm pjesëmarrje në qeverisje. Udhëheqësit e regjimeve totalitare kanë frikë nga bashkëvendimmarrja. Opozita nuk duhet të mjaftohet vetëm me pjesëmarrjen në qeveri”, u shpreh Haradinaj.

“Çështja është nëse Kurti e interpreton rezultatin si bashkëvendimmarrje. Nëse e sheh në këtë mënyrë, atëherë mund të ketë kuptim dialogu; në të kundërt, takimet janë të kota. Nuk besoj se opozita e ndihmon Kosovën duke hyrë në qeveri vetëm për përfitime pushteti. Kontributi i saj vjen vetëm kur është pjesë e vendimmarrjes. Nëse kemi rol në bashkëvendimmarrje, atëherë po”, deklaroi ai.

Sipas Haradinajt, opozitës duhet t’i besohet njëri prej dy posteve kryesore: ai i Presidentit ose drejtimi i Qeverisë.