Haradinaj: Në mungesë të një pakti opozitar, Kosova do të mbetet në “epokën Kurti”

Ramush Haradinaj, ish-kryetar i AAK-së, deklaroi se opozita nuk ka arritur të ndërtojë një marrëveshje të përbashkët politike dhe as të dalë me një kandidat unik, çka sipas tij po bën që vendi të vazhdojë të drejtohet nga agjenda e Lëvizjes Vetëvendosje dhe e kryeministrit në detyrë, Albin Kurti.

Ai tha se ndryshimi i gjendjes aktuale politike mund të vijë vetëm nëse partitë opozitare bashkohen përmes një kontrate të qartë politike dhe mbështesin një kandidat të përbashkët për president.

“Ne po jetojmë në epokën Kurti, që i vjen ai kur ka një, 40% ose mbi 40 deputetë, do ta zbaton agjendën e tij në Kosovë.

Ndikimi jonë, ose ne do të mundshim me jetu jo vetëm në epokën e tij por edhe në epokën e të tjerëve, sikur të kishim një kontratë të përbashkët si opozitë. Pra, AAK dhe LDK, PDK, edhe një plan konkret, një kandidaturë konkrete”, tha ai.

Sipas Haradinajt, për sa kohë opozita nuk organizohet rreth një alternative të qartë, Kurtit i hapet rruga që të vazhdojë me politikat e tij dhe ta çojë vendin sërish në zgjedhje.

“Përderisa nuk kemi, një kontratë edhe s’kemi një ofertë, ne jetojmë në epokën Kurti, në agjendën Kurti dhe ai do ta zbaton atë që di më së miri, një lloj eksperimentimi me Kosovën e do të na dërgon në zgjedhje prapë. Pra kjo është ajo që e di edhe ajo që po ndodh.

Nga përvoja ime politike e gjatë unë po e lexoj këtë”, tha ai.

Haradinaj foli edhe për çështjen e zgjedhjes së presidentit, duke vlerësuar se opozita mund të marrë rol vendimtar nëse arrin një dakordim të përbashkët.

“Opozita mundet pra, me hy e me qenë faktor në marrjen e fatit të vendit në dorë, duke pasur një kontratë mes vete edhe një kandidaturë për president. Nëse dikush nga opozita e merr mbështetjen e opozitës, gjithsesi që do ta mbështesja, nëse do të isha i propozuar (për president) do ta shqyrtoja.

Pra, nuk jam kandidat, nuk kam kushte, nuk kam kërkesë për askënd. Ne nuk bëhemi pjesë e qeverisjes ose vazhdimit të qeverisjes Kurti, se e kemi shpjeguar disa herë sa e dëmshme edhe sa humbje është për Kosovën. Po e thashë edhe një herë, përderisa VV nuk bie nën 40%, do të jetojmë në epokën Kurti, në agjendën Kurti, në eksperimentin Kurti.

Mundemi me e pengu këtë, mundemi me e ndryshu vetëm nëse bëhemi bashkë opozita”, tha ai.