Haradinaj mirëpret në Gllogjan delegacionin nga SHBA dhe vlerëson me medalje Daniel Serwer e Mario Marquez

Ramush Haradinaj, ish-kryeministër i Kosovës, njoftoi se në Gllogjan ka pritur një delegacion nga Shtetet e Bashkuara të Amerikës, në kuadër të aktiviteteve që shënojnë 4 Korrikun, Ditën e Pavarësisë së SHBA-së.

Pjesë e këtij delegacioni ishin profesorët Daniel Serwer dhe Edward Joseph, si edhe Mario Marquez, Ramiz Tafilaj dhe shqiptaro-amerikanë të tjerë. Haradinaj nderoi Daniel Serwerin dhe Mario Marquezin me medaljen “Me besim në Zot, Atdhe e Shtet”.

Sipas Haradinajt, kontributi i tyre për Kosovën ka rëndësi të veçantë në rrugën drejt rikthimit të partneritetit strategjik me aleatët, sidomos me Shtetet e Bashkuara të Amerikës.

Haradinaj publikoi edhe mesazhin e plotë:

Në nderim të 4 Korrikut, Ditës së Pavarësisë së Shteteve të Bashkuara të Amerikës, në Gllogjan patëm nderin t’i presim delegacionin nga Amerika, në përbërje të Prof. Daniel Serwer, Prof. Edward Joseph, Mario Marquez dhe Ramiz Tafilaj dhe shqiptaro-amerikanë tjerë të respektuar.

Angazhimi i tyre ndaj Kosovës është shumë me vlerë për rrugën dhe përcaktimet drejt rikthimit në partneritetin strategjik me aleatët, posaçërisht me Shtetet e Bashkuara të Amerikës.

Me respekt dhe mirënjohje për mbështetjen e vazhdueshme ndaj Kosovës në të gjitha etapat, z. Daniel Serwer dhe z. Mario Marquez i dedikova medaljen “Me besim në Zot, Atdhe e Shtet”.