Hafir Hoxha kërkon sqarime për thirrjen e Lushtakut: Çfarë armësh do të përdoren dhe kush do t’i komandojë qytetarët?

Ish-ushtaraku Hafir Hoxha ka reaguar pas deklaratës së deputetit të PDK-së, Mërgim Lushtaku, i cili kërkoi që Kuvendi i Kosovës të miratojë armatosjen e çdo qytetari nëse katër ish-krerët e UÇK-së dënohen në Hagë.

Sipas Hoxhës, një qëndrim i tillë nuk mund të anashkalohet si një deklaratë e parëndësishme, sidomos kur vjen nga një deputet që, siç shprehet ai, ka pasur në zyrën e tij ish-komandantë të UÇK-së.

Ai lë të kuptohet se Lushtaku mund të ketë dijeni ose arsye konkrete që e kanë shtyrë të bëjë këtë thirrje. Megjithatë, Hoxha thotë se shpreson që një skenar i tillë të mos realizohet dhe që pjesëtarët e UÇK-së, të cilët i konsideron të pafajshëm, të lirohen.

“Kur një deputet që në zyrën e tij i ka pas ish-komandantët e UÇK-së bën këso thirrje, atëherë unë nuk i marrë si jo serioze! Me siguri ka arsye, din diçka”, ka shkruar Hoxha.

Ndërsa parashtron mundësinë që vendimi në Hagë të mos jetë ai që shpresohet, ish-ushtaraku pyet për pasojat që do të kishte një situatë e tillë dhe për motivin e kërkesës që qytetarët të armatosen.

“Shpresojmë të mos ndodhë dhe të lirohen të pafajshëm pjesëtarët e UÇK-së! Por ja paska gjasa edhe me u dënu”, shkruan ai.

Hoxha kërkon të dijë më konkretisht se çfarë do të përfshinte armatosja e qytetarëve, duke ngritur pyetje për modelin dhe kalibrin e armëve, sasinë e municionit, detyrat që do t’u caktoheshin qytetarëve dhe mënyrën e mobilizimit apo komandimit të tyre.

“Duhet të di, vlla, çfarë modeli, çfarë kalibri të armës me ble! Sa municion, çfarë detyre do të kem, kush ku ka me më mobilizu, me më komandue!”, ka deklaruar ai.

Sipas tij, kur bëhet një kërkesë publike për armatosje, qytetarët duhet të informohen më herët për arsyen e saj, rrethanat në të cilat armët do të përdoreshin dhe mënyrën se si do të organizohej një mobilizim i mundshëm.

“Kur dikush më kërkon të armatosëm, nuk është keq pak me tregue edhe si e pse! Bile pak më herët, të di nëse është e mundur, kuptohet?”, përfundon reagimin e tij ish-ushtaraku.