Gjini: Vetëvendosje po synon zgjedhjet e reja më 27 dhjetor

Pak para rifillimit të seancës konstituive, kryetari i Aleancës për Ardhmërinë e Kosovës (AAK), Ardian Gjini, deklaroi se Vetëvendosje po e synon 27 dhjetorin si datë për mbajtjen e zgjedhjeve të reja.

Sipas Gjinit, çështja e nënkryetarëve të Kuvendit nuk ka qenë problem për VV-në, qoftë kur bëhej fjalë për Vlora Çitakun, Kujtim Shalën apo përfaqësuesit e komunitetit serb.

“Ju kemi thënë, po e ndjekin datën 27 dhjetor. Prej sot, 60 ditë afat për zgjedhjen e presidentit, plus deri në 45 ditë zgjedhjet. Tash e ka 27 dhjetorin që e ka kërkuar”, ka shkruar Gjini.

Kreu i AAK-së e akuzoi Vetëvendosjen se synimi i saj ka qenë arritja e afatit të sotëm.

“Nuk kanë pasur problem as me Vlora Çitakun, as me Kujtim Shalën, as me ‘popullin serb’. Problemi ka qenë me e mbërri datën e sotme. Afatin”, ka deklaruar Gjini.

Gjini shtoi se qytetarët tashmë, sipas tij, e kanë kuptuar se Vetëvendosje është “mashtruese dhe manipuluese”. Ai theksoi se AAK-ja nuk ka frikë nga zgjedhjet.

“Nëse doni, shkojmë në zgjedhje! Mos u frikësoni prej zgjedhjeve!”, përfundoi Gjini.