Gëzim Mekuli sulmon deklaratën e ministres serbe dhe akuzon Edi Ramën për heshtje

Publicisti Gëzim Mekuli ka reaguar ndaj deklarimit të ministres serbe Snezana Paunoviç, e cila është shprehur se, sikur të ndodhej në vend të Sllobodan Millosheviqit në vitin 1998, do ta kishte “pastruar etnikisht Kosovën”.

Përmes një publikimi në rrjetet sociale, Mekuli e përkufizoi këtë qëndrim si një “thirrje naziste”, ndërsa kritikoi autoritetet shqiptare për atë që ai e konsideron mungesë të një reagimi zyrtar.

Në reagimin e tij, ai hodhi akuza edhe ndaj kryeministrit Edi Rama, duke e cilësuar heshtjen dhe raportin e tij me Serbinë si të papranueshëm.

Më poshtë reagimi i plotë i Mekulit:

Mos e goditni Paunoviçin në Beograd, por Paunoviçin “tonë” në Tiranë.

Snezana Paunoviç, nxënëse e Çubrilloviqit, Andriqit dhe Millosheviqit, ministre e qeverisë serbe, e deklaroi haptazi: “Po të isha në vend të Millosheviçit në vitin 1998, do ta kisha pastruar etnikisht Kosovën.”

Sipas tij, kjo është një thirrje e hapur naziste, e cila rikthen memorandumet e tmerrshme të Vaso Çubrilloviqit dhe Ivo Andriqit për shfarosjen e shqiptarëve, ndërsa nga Tirana zyrtare ka marrë vetëm heshtje të turpshme.

Edi dRama, ku je?

Ai shkruan se dRama, “si një palaço me atlete të bardha”, endet në korridoret e Parisit, u godet shpatullat miqve në Beograd, ankohet në mediat serbe për dështimin e “Ballkanit të Hapur” me Vuçiçin dhe sulmon protestuesit në Tiranë e Albin Kurtin në Prishtinë, pra më shumë se gjysmën e kombit shqiptar.

Sipas Mekulit, klasa politike e çoroditur e Tiranës mjaftohet me deklarata të konsumuara, duke dëshmuar se është e kalbur, e korruptuar dhe frikacake përballë asaj që ai e quan kërcënim kombëtar nga fashizmi serb.

Të heshtësh kur bëhen thirrje naziste për spastrim etnik ndaj popullit tënd, thotë ai, përbën tradhti të pastër.

Një (pa)krye-ministër që nuk ka guxim të mbrojë dinjitetin dhe ekzistencën e kombit përballë fashizmit serb, sipas tij, duhet të largohet sa më shpejt nga politika.

Ai shton se mbrojtja e shqiptarëve jashtë kufijve të Shqipërisë është gjithashtu obligim Kushtetues.

Apo jo, ti, miku i Vuçiqit dhe armiku i Albin Kurtit?