Gërvalla dhe Sveçla japin sot detaje për rastin e Arlinda Zekajt, ndërsa paralajmërohet protestë para Qeverisë

Ministrja e Drejtësisë, Donika Gërvalla, dhe ministri i Punëve të Brendshme, Xhelal Sveçla, pritet të dalin sot në një konferencë të përbashkët për rastin e Arlinda Zekajt, e vrarë në Vitomiricë të Pejës.

Dalja para mediave është caktuar për orën 09:00 në Zyrën e Kryeministrit të Kosovës. Në të njëjtën orë, para ndërtesës së Qeverisë është paralajmëruar një protestë kundër vrasjes së grave.

Protesta po organizohet pas reagimeve të shumta për vrasjen e Zekajt dhe thirrjeve që institucionet përgjegjëse të japin llogari. Ditët e fundit janë mbajtur edhe protesta, ku është kërkuar hetimi i veprimeve dhe mosveprimeve të zyrtarëve të përfshirë në trajtimin e rastit.

Zyra e Kryeministrit bëri të ditur një ditë më parë se kishte pranuar raportet e detajuara nga Ministria e Drejtësisë dhe Ministria e Punëve të Brendshme për rastin.

Sipas njoftimit, dokumentet do të analizohen me hollësi në bashkëpunim me ministrat përkatës, me synim shqyrtimin e historikut dhe ecurisë së rastit, si dhe identifikimin e lëshimeve të mundshme, neglizhencës, mosreagimit dhe përgjegjësisë institucionale.

Në njoftim thuhet se shqyrtimi do të përfshijë çdo lëshim dhe trajtim të papërgjegjshëm, neglizhencën dhe mungesën e reagimit, si edhe çështjet që lidhen me procedurën dhe përgjegjësinë institucionale.

Qeveria njoftoi se konferenca e Gërvallës dhe Sveçlës do t’i kushtohet raporteve të pranuara dhe hapave të mëtejshëm lidhur me rastin.