Gazmir Raci: Partitë duhet të marrin përgjegjësi për zhbllokimin e Kuvendit të mërkurën

Deputetët e zgjedhur pritet të rikthehen të mërkurën paradite në seancën konstituive të Kuvendit, e cila nuk arriti të përmbyllej gjatë muajit të kaluar.

Mbledhja synon të çojë përpara krijimin e institucioneve të reja pas zgjedhjeve të qershorit, ndërsa subjektet politike përballen me trysni të shtuar për të gjetur një zgjidhje dhe për t’i dhënë fund ngërçit të gjatë institucional.

Analisti politik Gazmir Raci u ka bërë thirrje partive që në seancën e së mërkurës të veprojnë me përgjegjësi dhe të angazhohen seriozisht për përfundimin e konstituimit të Kuvendit.

Ai ka theksuar se, pas një bllokade të zgjatur politike, Kosova nuk mund të përballojë më humbje kohe dhe zgjatje të krizës institucionale.

“Pres që të mërkurën subjektet politike të marrin përgjegjësinë e tyre dhe të bëjnë përpjekje konkrete për ta përmbyllur konstituimin e Kuvendit. Pas një periudhe kaq të gjatë bllokade, Kosovës i mungon koha për të vazhduar me krizën institucionale”, ka deklaruar Raci.

Ai ka shtuar se konstituimi i Kuvendit përbën parakushtin e parë për funksionalizimin e institucioneve të reja. Sipas tij, një marrëveshje politike për mbylljen e kësaj procedure do të mundësonte vijimin e proceseve të tjera kushtetuese.

Raci e ka konsideruar zhvillim pozitiv pranimin e parimit për zgjedhjen e një presidenti konsensual, ndërsa ka vlerësuar se Bekim Sejdiu do të ishte një kandidat i përshtatshëm për këtë post.

“Është një sinjal pozitiv që Lëvizja Vetëvendosje e ka pranuar parimin e një presidenti konsensual. Presidenti duhet të jetë përfaqësues i unitetit të vendit, e jo vetëm i një shumice parlamentare. Në këtë drejtim, dr. Bekim Sejdiu ishte emri i duhur në kohën e duhur, pasi ka profil institucional e profesional dhe mundësi për të ndërtuar një konsensus më të gjerë politik”, ka thënë ai.

Analisti ka shprehur keqardhje për qëndrimin e gjashtë deputetëve të LDK-së, të cilët, sipas informacioneve të bëra publike, nuk pranojnë ta mbështesin këtë kandidaturë për arsye që lidhen me raporte ose kundërshti personale.

“Përplasjet dhe interesat personale nuk mund të vendosen mbi nevojën e Kosovës për institucione të qëndrueshme. Vendi nuk duhet ta humbasë mundësinë për të arritur konsensus për shkak të kalkulimeve individuale”, është shprehur Raci.

Ai ka përfunduar se Kosovës i nevojiten institucione funksionale, stabilitet politik dhe përqendrim te sfidat e brendshme dhe agjenda ndërkombëtare, duke nënvizuar se përgjegjësia tashmë u takon drejtpërdrejt përfaqësuesve të zgjedhur të qytetarëve.