FOL kërkon nga Kuvendi i Kosovës mbikëqyrje më të fuqishme mbi zbatimin e ligjeve të punës

Lëvizja FOL ka hartuar një dokument politikash në kuadër të nismës “Llogaridhënia në Zbatimin e Ligjit të Punës dhe Transparenca e të Drejtave të Punëtorëve”. Publikimi mbështetet në monitorimin e efikasitetit të gjyqësorit gjatë shqyrtimit të kontesteve të punës, si dhe në vlerësimin e punës së Inspektoratit të Punës.

Përmes këtij dokumenti paraqitet një analizë e integruar mbi mënyrën se si funksionon sistemi për zbatimin e legjislacionit të punës në Kosovë. Në të pasqyrohen përparimet e shënuara dhe sfidat që vazhdojnë të jenë të pranishme, ndërsa identifikohen edhe sektorët ku kërkohen ndërhyrje dhe reforma prioritare për mbrojtjen më efikase të të drejtave të punëtorëve.

Në rekomandimet e saj, FOL kërkon që Kuvendi i Kosovës ta përdorë rolin ligjvënës dhe mbikëqyrës për të ndihmuar në ndërtimin e një kornize më të qartë dhe funksionale për zbatimin e legjislacionit të punës. Dokumenti sugjeron të vlerësohet nevoja për plotësime dhe ndryshime ligjore që përcaktojnë më qartë kompetencat e Inspektoratit të Punës.

Gjithashtu, propozohet fuqizimi i kontrollit parlamentar ndaj mekanizmave që kanë përgjegjësi për mbrojtjen e të drejtave të punëmarrësve. Kuvendit i rekomandohet të kërkojë raporte periodike nga institucionet kompetente lidhur me zbatimin e legjislacionit të punës dhe ecurinë e trajtimit të sfidave të evidentuara.

Përfundimet dhe propozimet e përfshira në dokument synojnë të rrisin llogaridhënien e institucioneve, të bëjnë më efikas shqyrtimin e kontesteve të punës dhe të përmirësojnë zbatimin e legjislacionit të punës në Kosovë.