Deliu i kërkon Gërvallës procedimin urgjent të Projektligjit për Dhomat e Specializuara

Deputetja e PDK-së, Blerta Deliu, i ka bërë thirrje ministres së Drejtësisë, Donika Gërvalla, që të mos e vonojë Projektligjin për ndryshimin dhe plotësimin e Ligjit për Dhomat e Specializuara.

Deliu ka kërkuar që dokumenti të procedohet fillimisht në Qeveri dhe më pas të dërgohet në Kuvendin e Kosovës, ku deputetët duhet të kenë mundësinë ta votojnë.

Përmes një reagimi në Facebook, deputetja ka theksuar se 99 deputetë të Kuvendit të Kosovës, nga të gjitha partitë politike, janë bashkuar me votë të lirë dhe unanime në mbrojtje të luftës së UÇK-së dhe në përkrahje të katër ish-udhëheqësve të saj në Hagë.

Sipas saj, Kuvendi dhe deputetët tashmë e kanë dëshmuar vullnetin politik përmes votës, ndërsa përgjegjësia i takon ministres së Drejtësisë që ta çojë përpara këtë nismë.

“Donikë, mos e vono Projektligjin për ndryshimin dhe plotësimin e Ligjit për Dhomat e Specializuara. Deputetët e Kuvendit e kanë kryer pjesën e tyre, duke e shprehur qëndrimin politik me votë. Tani duhet ta bësh edhe ti detyrën tënde si Ministre e Drejtësisë dhe ta procedosh Projektligjin në Qeveri, në mënyrë që ai të mbërrijë menjëherë në Kuvend për votim”, ka shkruar Deliu.

Ajo ka shtuar se deklaratat duhet të shoqërohen me veprime konkrete, pasi udhëheqësit e luftës dhe të paqes kanë nevojë për hapa të qartë institucionalë.

“Mos e ndal këtë proces dhe mos e blloko iniciativën. Kuvendit nuk duhet t’i pamundësohet vendimmarrja për këtë Projektligj. Nëse vendi shkon në zgjedhje pa e pasur Kuvendi mundësinë ta votojë, përgjegjësia politike për mosprocedimin e tij duhet të jetë e qartë. Miratimi i këtij ligji do të krijonte mundësi edhe për avancimin e proceseve të tjera politike. Sille ligjin, Donikë!”, ka deklaruar deputetja e PDK-së.