Debat për Abdixhikun në LDK, qytetarët me qëndrime të kundërta për të ardhmen e tij

Kërkesat që degët e Lidhjes Demokratike të Kosovës në Prishtinë, Pejë dhe Lipjan kanë bërë për dorëheqjen e Lumir Abdixhikut kanë hapur diskutime të forta, jo vetëm në strukturat e partisë, por edhe te qytetarët.

Teksa LDK-ja po diskuton për drejtimin që duhet të ndjekë pas zgjedhjeve dhe për të ardhmen e saj politike, opinionet për kryetarin aktual mbeten të ndara. Një pjesë e qytetarëve mendojnë se Abdixhiku duhet të vazhdojë në krye të subjektit, ndërsa të tjerë vlerësojnë se partisë i duhet një ndryshim në udhëheqje.

Ragip Gashi tha se largimi i Abdixhikut nuk do të ishte problem, duke u shprehur për KosovaPress se “Nuk është galje se ka Lumira mjaft.”

Më kritik u tregua Sejdi Shala, i cili tha se brenda LDK-së ka figura me më shumë peshë politike. Sipas tij, “Abdixhiku është momentalisht kryetar i partisë, po edhe meritat i ka Lutfi Haziri. Po më duket që është pak ai më i mençur se Lumiri. Kurse gjendja e opozitës nuk është duke menduar për popull, por është duke menduar për xhepat personalë. Sidomos PDK-ja, LDK-ja, AAK-ja, që 20 vjet ndërroheshin në qeveri edhe vetëm i mbushnin xhepat për vete, e për popull se kishin gajle.”

Kritika edhe më të forta u dëgjuan nga qytetarët që besojnë se Abdixhiku nuk i përmbushi pritjet e krijuara kur mori drejtimin e partisë.

Omer Halimi u shpreh se LDK-ja ka pasur figura më të përgatitura për këtë post. Ai tha: “Po Lumirin është dashur me fillim mos me bë atë kryetar partie, se ka pasur njerëz më të eminent se ky Lumiri. Mirëpo është problemi i këtyre deputetëve edhe kryesisë së LDK-së. Kështu, për mendimin tim, ai s’ka dashur me qenë as kryetar i LDK-së, se ka njerëz shumë më të aftë se ai. Me ardhjen e tij, LDK-ja vetëm çka, unë s’di çka ka fituar LDK-ja. Kur një kryetar i një partie thotë se ‘unë po vij e po i fitoj zgjedhjet edhe po bëhem unë, unë jam kryeministër, unë jam për president’, e tash kur s’ka arritur asgjë hiç, ai patjetër duhet të shkojë te shtëpia.”

Edhe një qytetar tjetër, i cili nuk pranoi të identifikohej, e konsideroi largimin e mundshëm të Abdixhikut si pasojë të veprimeve të tij politike. Ai deklaroi: “E ka lypë, e ka bë vendin, le të largojnë… Sepse e ka tradhtu Vjosën, e ka marrë me ja dhënë votat .Tash , s’ka pas mundësi me ia dhënë shumë. S’ka punu mirë”.

Ka edhe zëra që mendojnë se LDK-ja nuk lidhet me një emër të vetëm dhe se ndërrimi i kryetarit nuk do ta dëmtonte të ardhmen e saj.

Ndrec Shkodra tha se edhe nëse Abdixhiku largohet, kjo nuk do të thotë se LDK-ja bie. Sipas tij, “Po me thënë të drejtën, edhe në qoftë se largohet, nuk është e thënë që LDK-ja bien. LDK-ja është një ndër partitë më të vjetra në Kosovë dhe kjo ka perspektivën. E vetmja parti që mund ta mbrojë këtë vend është LDK-ja… LVV-ja po shihet çfarë kemi prej saj, deri tash asnjë rezultat s’kemi prej saj. LDK-ja ka rënë domethënë prej asaj pozite që ka qenë më herët, por unë jam i besueshëm që nuk shkon gjatë edhe do të ngrihet. Abdixhiku nuk është që me thënë të drejtën, një lider që në qoftë se largohet, LDK-ja do të bie. Mund të vijnë të tjerë, LDK-ja ka mjaft kuadro të shkolluara, të ngritura. Kështu që besoj që edhe në qoftë se Abdixhiku bien, vjen dikush tjetër që do ta zëvendësojë pa asnjë lloj problemi.”

Nëse emri i Lumir Abdixhikut po vazhdon të shkaktojë ndarje mendimesh brenda dhe jashtë LDK-së, debat po ngjall edhe emri i Vjosa Osmanit.

Për disa qytetarë, presidentja mbetet ndër figurat më të vlerësuara në politikën e vendit.

Ragip Gashi tha se, po të varej nga ai, do ta propozonte Vjosa Osmanin, duke u shprehur: “E valla për Vjosën, ka qenë mirë, unë do ta kisha propozu. Do ta kisha propozu Vjosën. Sepse s’ka asnjë, si puna e Vjosës s’ka. Ka bë çka ka bë, më të mirë se ajo s’ka.”

Edhe Sejdi Shala dha vlerësime pozitive për Osmanin. Ai tha: “Mua më ka pëlqyer ajo femër, është serioze, ka menduar për shtet edhe besa shtetin, goxha e ka çuar lart sa i përket Evropës e botës.”

Megjithatë, jo të gjithë ndajnë të njëjtin mendim. Omer Halimi e sheh raportin e Osmanit me LDK-në si një plagë politike të pambyllur. Sipas tij, “Vjosa me një, me një mënyrë e ka shkatërruar LDK-në vetë, ajo. Me ardhjen e asaj, ajo nuk ka dashur aty me u kyç fare, hiç. Ndoshta kishte me qenë edhe më mirë. Populli s’harron, populli dënon. Kështu që nuk e besoj, edhe me ardh Vjosa si kryetare e LDK-së, edhe me ardh kushdo, dikush me ardh, nuk është qaq punë e lehtë me udhëheq LDK-në. Se me vdekjen e presidentit historik Ibrahim Rugova, LDK-ja më nuk ka pasur kurrë më, si me thënë, s’ka qenë qaq prioritare e popullit të Kosovës.”

Në të njëjtën vijë u shpreh edhe Ndrec Shkodra, i cili vlerësoi se rikthimi i atyre që janë larguar nga partia nuk duhet të shoqërohet menjëherë me poste të larta. Ai tha: “Vjosa Osmani, me keqardhje duhet me folë, gabimet që i ka bë nuk i falen. Nuk i falen, për shkak se prej një partie që e ka shkollu, e ka ngritë në politikë, edhe ka shku në një anë tjetër, kur e pa që ia bën mjegull partia e LVV-së, edhe e rrëzun prej pushtetit, u kthye përsëri në LDK. Nuk jam kundërshtar i asaj që u kthye, po pozita që ka pasë, kemi njerëz në LDK që janë me vjet të tëra e nuk e kanë arritë atë rezultat për me mbërri aty. Me mbërri kjo prej asaj pjese që e ka kundërshtu, u largu njëherë, me u kthye drejt për së drejti, me qenë në pozitë më të lartë, nuk nuk preferoj. Nuk është që është e pashkolluar, po vërejtjen që e ka, pak duhet me e stagnu. Edhe ta kuptojë secili anëtar i LDK-së që ka emër, që kur të largohet në këtë mënyrë, kur të kthehet, duhet me mbajtë një pozitë për një periudhë pak më të ultë, edhe me qenë pak më e lënë ta kuptojë se çka domethënë të largohesh prej një partie të madhe.”