António Costa, president i Këshillit Evropian, tha se Kosova, Maqedonia e Veriut dhe Bosnja e Hercegovina mund të avancojnë më tej drejt anëtarësimit në Bashkimin Evropian nëse përshpejtojnë reformat e kërkuara.
Në një deklaratë të publikuar më 3 nëntor, gjatë Samitit të Euronews për Zgjerimin e BE-së 2026, Costa përsëriti se të gjitha vendet e Ballkanit Perëndimor e kanë të ardhmen brenda Bashkimit Evropian.
None found
“Jam plotësisht i bindur se e ardhmja e të gjitha vendeve të Ballkanit Perëndimor është në Bashkimin Evropian. Mendoj se Maqedonia e Veriut, Bosnja dhe Hercegovina dhe Kosova mund të përparojnë më tej dhe të shpejtojnë reformat e nevojshme në rrugën drejt anëtarësimit në BE”, deklaroi Costa.
Ai bëri të ditur se zhvillimet në rajon do të shqyrtohen pas 3 javësh, në samitin e radhës mes BE-së dhe Ballkanit Perëndimor.
“Pas 3 javësh, në samitin e katërt BE-Ballkani Perëndimor, që do të mbahet gjatë mandatit tim, do t’i diskutojmë këto dhe çështje të tjera me të gjithë udhëheqësit e Ballkanit Perëndimor”, tha ai.
Duke iu referuar zgjerimit, Costa nënvizoi se anëtarësimi nuk kufizohet te përafrimi i ligjeve dhe institucioneve me standardet evropiane. Sipas tij, ai kërkon gjithashtu ndërtimin e besimit, zgjidhjen diplomatike të mosmarrëveshjeve dhe bashkëpunim mes vendeve.
Për Serbinë, ai tha se zgjedhjet e fundit tregojnë synimin e qytetarëve për të ndërtuar një shoqëri më të drejtë dhe me më shumë përgjegjësi.
Bashkimi Evropian, shtoi Costa, është i gatshëm të ndihmojë qeverinë e re të Serbisë në afrimin e vendit me Evropën, veçanërisht për çështjet që lidhen me sundimin e ligjit, lirinë e mediave dhe luftën kundër korrupsionit.
Ndërkaq, ai përgëzoi Malin e Zi për ecurinë në negociatat e anëtarësimit dhe tha se vendi po i afrohet përmbylljes së procesit.
Costa shprehu bindjen se Mali i Zi mund të jetë anëtari i 28-të i Bashkimit Evropian deri në vitin 2028.
Presidenti i Këshillit Evropian e përshkroi zgjerimin si përparësi strategjike për BE-në dhe si investim në paqe, siguri, demokraci e prosperitet.
Ai theksoi se procesi duhet të jetë i drejtë, i qëndrueshëm dhe i mbështetur te meritat, ndërsa vendet kandidate duhet të vijojnë reformat demokratike.
“Nuk mund të përparosh drejt Bashkimit Evropian duke u larguar nga demokracia”, përfundoi Costa.
Rritja e çmimeve po bëhet një burim i konsiderueshëm i të ardhurave shtesë në buxhetin e shtetit. Sipas parashikimeve të…
Në Kuvendin e Republikës së Kosovës, gjatë ditës së sotme, janë paraparë të mbahen disa takime të komisioneve parlamentare, ku…
Ditën e mërkurë vendi ynë do të ndikohet nga masa ajrore të qëndrueshme. Moti parashikohet të jetë me alternime kthjellimesh…
Dashi Dashi do ta nisë ditën me shumë energji dhe me dëshirën për të arritur objektiva konkrete. Kjo mund të…
Në Shtetet e Bashkuara të Amerikës vijon numërimi i votave për zgjedhjet e mesmandatit të 3 nëntorit, të cilat do…
Lajmet po vijnë me një ritëm aq të shpejtë pas humbjes zgjedhore të 25 tetorit të ish-liderit autoritar serb, Aleksandar…