Burjani: Zgjidhja kalon përmes koalicionit me LDK-në, përndryshe vendi shkon në zgjedhje

Albulena Haxhiu, ndonëse është zgjedhur në krye të Kuvendit të Kosovës, po vazhdon të ushtrojë edhe funksionin e presidentes së vendit gjatë kësaj periudhe.

Ajo do t’i mbajë të dyja postet deri në gjetjen e një zgjidhjeje për zgjedhjen e presidentit të ri të Kosovës.

Megjithatë, mbetet e paqartë se cilat do të jenë zhvillimet nëse presidenti i ri nuk zgjidhet deri më 6 tetor, datë kur përfundon afati i përcaktuar.

Në një rast të tillë, institucionet do të përballen me nevojën për të përcaktuar hapat e mëtejshëm, ndërsa partitë politike kanë kohë të kufizuar për të shmangur një krizë tjetër institucionale.

Juristi Blerim Burjani, në një prononcim për “Bota sot”, vlerësoi se duhet një angazhim më i madh politik për të arritur kompromis, pasi në të kundërtën zgjedhjet e jashtëzakonshme nuk mund të shmangen.

Sipas tij, Haxhiu është ngarkuar me këtë detyrë dhe brenda 60 ditësh duhet të zgjidhet presidenti. Nëse procesi dështon, vendi kalon në zgjedhje të jashtëzakonshme, pasi ky është afati në dispozicion për zgjedhjen e kreut të shtetit.

Burjani tha se përgjegjësia kryesore për gjetjen e një zgjidhjeje tani i takon VV-së. Ai theksoi se, nëse nuk arrihet marrëveshje, afati kushtetues do të vazhdojë të ecë dhe Kosova do të detyrohet të mbajë zgjedhje të reja.

Si alternativë, juristi përmendi krijimin e një koalicioni klasik me LDK-në, ku kësaj partie do t’i jepej posti i presidentit dhe pesë ministri. Sipas tij, një marrëveshje e tillë do ta qartësonte situatën, ndërsa në mungesë të saj rruga të çon drejtpërdrejt në zgjedhje.