Bahtiri kundërshton deklaratën e Simiqit: Në emër të popullit serb në Kosovë mund të flasë vetëm Vuçiqi

Deputeti i Lëvizjes Vetëvendosje, Agim Bahtiri, ka reaguar ndaj fjalimit të deputetit të Listës Serbe, Igor Simiq, në Kuvendin e Kosovës.

Bahtiri ka vënë në pikëpyetje mënyrën se si Simiqi e ka paraqitur propozimin për nënkryetar të Kuvendit. Sipas tij, deputeti nuk foli në emër të Listës Serbe, por përdori shprehjen “në emër të popullit serb”.

“‘Në emër të popullit serb’ mund të propozojë vetëm Vuçiqi në Serbi, e jo Igor Simiqi në Kosovë!”, ka shkruar Bahtiri.

Ai ka theksuar se të gjithë deputetët në Kuvendin e Kosovës janë përfaqësues të Republikës së Kosovës, ndërsa deklarimin e Simiqit e ka cilësuar si të papajtueshëm me Kushtetutën.

“Në këtë Kuvend jemi të gjithë deputetë të Republikës së Kosovës. Ky gjest i tij është antikushtetues”, ka deklaruar Bahtiri.

Deputeti i Vetëvendosjes u ka bërë thirrje organeve të drejtësisë dhe hetuesisë që të analizojnë deklaratën e Simiqit, si dhe rrethanat në të cilat ajo është bërë.

“Si deputet, kërkoj nga organet e hetuesisë dhe drejtësisë që ta vlerësojnë këtë deklarim dhe kontekstin në të cilin është bërë. Ligji duhet të jetë i barabartë për të gjithë”, ka përfunduar Bahtiri.