Albin Kurti pezullon drejtorin Hysen Muzliukaj pas aktakuzës për keqpërdorim të detyrës

Drejtori i Përgjithshëm i Institutit të Kosovës për Administratë Publike, Hysen Muzliukaj, është pezulluar nga detyra me vendim të kryeministrit Albin Kurti.

Vendimi, i publikuar në Gazetën Zyrtare, është marrë pas ngritjes së aktakuzës ndaj Muzliukajt për kryerje të veprës penale gjatë ushtrimit të funksionit zyrtar.

Muzliukaj do të qëndrojë i pezulluar deri në përfundimin e procedurës penale. Gjatë kësaj kohe, atij do t’i paguhet 50 për qind e pagës së plotë.

Ai ishte emëruar në krye të Institutit të Kosovës për Administratë Publike më 1 gusht të vitit 2025.

Muzliukaj, i cili më herët ka shërbyer si këshilltar politik i ish-ministrit të Bujqësisë, Faton Peci, si dhe si drejtor komunal në Mitrovicë gjatë mandatit të Agim Bahtirit, u arrestua në korrik të vitit 2023 nga Prokuroria Speciale, bashkë me ish-nënkryetarin e Mitrovicës, Faruk Mujkën.

Prokuroria kishte bërë të ditur atëherë se ishte lëshuar urdhër për kontrollin e banesës së tij. Megjithatë, ai u lirua një ditë pas arrestimit dhe u lejua të mbrohej në liri.

Sipas aktakuzës, në kohën kur ishte drejtor për Gjeodezi, Kadastër dhe Pronë në Komunën e Mitrovicës, Muzliukaj dyshohet për keqpërdorim të detyrës zyrtare lidhur me këmbimin e pronës së ish-Bankosit me pronë private.