Agim Rexhepi për situatën në veri: Forca e shtetit duhet ta tejkalojë atë të krimit

Agim Rexhepi, ekspert i sigurisë dhe ish-zyrtar i lartë i Policisë së Kosovës, ka folur për angazhimin e tij në veri të vendit, ndërsa ka vlerësuar se gjendja e sigurisë në atë zonë ka ndryshuar ndjeshëm me kalimin e viteve.

Ai ka treguar se në prill të vitit 2016 ishte emëruar në Njësinë e Krimeve Ekonomike. Sipas Rexhepit, ajo kohë përbënte një nga periudhat më të ndjeshme për sigurinë e Kosovës, ndërsa karriera e tij atje ishte shoqëruar me shumë sfida.

Duke krahasuar realitetin e sotëm me atë të së kaluarës, Rexhepi e ka përshkruar dallimin si kalimin nga një natë pa hënë në një ditë të kthjellët pranvere. Ai ka deklaruar se, deri në ardhjen e Albin Kurtit në pushtet, veriu ishte më shumë Serbi sesa vetë territori serb.

Sipas tij, rrethanat tani kanë ndryshuar, megjithëse serbët vazhdojnë të ndiejnë frikë nga strukturat që më parë i mbanin nën terror.

Rexhepi ka folur edhe për trysninë që, siç ka thënë, strukturat ilegale ushtronin mbi qytetarët në veri të Kosovës. Ai ka pohuar se, sa herë dëgjohej sirena, të gjithë ishin të detyruar të dilnin në rrugë, pasi mosbindja mund t’u rrezikonte jetën.

I pyetur nëse Policia e Kosovës do të arrijë ta mbajë nën kontroll veriun pa bërë kompromis me strukturat ilegale, ai është shprehur besimplotë. Rexhepi ka theksuar se policia kujdeset në mënyrë të barabartë për të gjithë qytetarët, pa asnjë dallim.

Ai ka nënvizuar se kriminelë gjenden kudo, por shteti duhet të jetë më i fuqishëm se krimi dhe, njëkohësisht, më i drejtë.

Ish-zyrtari policor ka deklaruar se do të vazhdonte pa hezitim të jepte kontributin e tij për sigurinë e vendit. Këtë angazhim ai e ka cilësuar si borxh ndaj Atdheut dhe si përmbushje të amanetit të atyre që ranë për këtë tokë.

Duke iu kthyer përvojës së tij si instruktor në Akademinë Policore, Rexhepi u ka kërkuar pjesëtarëve të rinj të Policisë së Kosovës të punojnë me profesionalizëm dhe përkushtim. Mesazhi i tij për ta është që ta duan ligjin dhe Kosovën, të qëndrojnë syçelë dhe ta mbrojnë dinjitetin.

Në përfundim, Rexhepi ka thënë se veriu nuk është vend për frikacakët, por për ata që shërbimin e kryejnë me shpirt dhe jo thjesht sipas orarit.