Abdixhiku: LDK-ja nuk do t’i nxisë qytetarët përballë njëri-tjetrit pas tensioneve në Kuvend

Kryetari i Lidhjes Demokratike të Kosovës, Lumir Abdixhiku, ka reaguar lidhur me tensionet e shënuara një ditë më parë në Kuvend.

Abdixhiku deklaroi se synimi i tij është konstituimi i Kuvendit dhe dhënia e kontributit për zgjedhjen e presidentit. Ai theksoi se LDK-ja është e gatshme të bashkëpunojë me të gjitha partitë politike për ta çuar përpara këtë proces.

Sipas tij, qytetarët nuk duhet të presin që LDK-ja të nxisë përplasje mes tyre, pasi një qasje e tillë nuk përfaqëson identitetin e kësaj partie.

“Jam i interesuar të kemi konstituim të Kuvendit, të kontribuojmë në zgjedhjen e presidentit dhe jam me të gjitha partitë politike për ta shtyrë këtë pozicion të LDK-së. Kështu do ta keni LDK-në. Pra, mos prisni që LDK-ja të vijë e t’i nxisë qytetarët e vet me njëri-tjetrin. Ajo nuk është LDK-ja. Jua rikujtoj se ne jemi Lidhja Demokratike e Kosovës, jo Partia Demokratike. LDK-ja është tjetër, PDK-ja tjetër”, ka thënë ai.