Në Pikën Kufitare Morin–Vërmicë janë krijuar radhë të gjata si pasojë e ndalimit të qarkullimit për mjetet e tonazhit të rëndë që transportojnë mallra industriale gjatë fundjavave të sezonit veror.
Dhjetëra kamionë kanë mbetur në pritje për të kaluar kufirin, ndërsa vargu i mjeteve është zgjatur për disa kilometra pranë pikës kufitare.
Të lidhura
None found
Drejtuesit e mjeteve thonë se gjendja është përkeqësuar jo vetëm nga kufizimi i lëvizjes, por edhe nga ecuria e ngadaltë e procedurave në palën kosovare të kufirit. Sipas tyre, përpunimi i kamionëve po bëhet vetëm në një sportel, çka po rrit kohën e pritjes dhe po rëndon trafikun.
Vendimi në fuqi parashikon që mjetet e transportit të mallrave të mos lejohen të qarkullojnë nga ora 15:00 deri në 24:00 të së premtes, si edhe nga ora 07:00 deri në 24:00 të së shtunës dhe të dielës. Për këtë arsye, qindra mjete të tonazhit të rëndë janë grumbulluar pranë kufirit në pritje të rifillimit të lëvizjes.
Shoferët ankohen se pritjet e zgjatura po u shkaktojnë humbje kohe dhe kosto shtesë financiare, duke ndikuar si në afatet e transportit të mallrave, ashtu edhe në të ardhurat e tyre.
Teksa fluksi i lëvizjes rritet gjatë sezonit turistik, drejtuesit e mjeteve kërkojnë që procedurat doganore të përshpejtohen dhe kufizimet e qarkullimit të rishikohen, në mënyrë që të shmangen bllokimet dhe radhët e gjata në kufirin Morin–Vërmicë.
