Si arriti një i burgosur të nxirrte shuma të mëdha parash nga brenda burgut?
Arthur Lee Cofield, i burgosur në një burg të sigurisë maksimale në Xhorxhia, arriti të grumbullojë të paktën 11 milionë dollarë duke luajtur një manjat filmi miliarder pa dalë kurrë nga qelia.
Ky rast i pabesueshëm mashtrimi ka bërë xhiron e internetit, duke shkaktuar kureshtjen e të gjithëve dhe jo padrejtësisht, pasi është e jashtëzakonshme mënyra se si i burgosuri i ka kryer mashtrimet.
Arthur Lee Cofield, 31 vjeç, drejtoi një operacion brenda Njësisë Speciale të Menaxhimit të Departamentit të Korrigjimeve, në të cilin ai mashtroi përfaqësuesit e shërbimit të klientit “Charles Schwab” për të besuar se ai ishte miliarderi nga Kalifornia Sidney Kimmel.
Charles Schwab Corporation është një kompani amerikane e shërbimeve financiare shumëkombëshe që ofron shërbime tregtare, bankare, investimesh dhe shërbime të ngjashme, duke përfshirë shërbime këshillimore dhe të menaxhimit të pasurisë për klientët me pakicë dhe institucionale.
Schwab, i cili brenda pak vitesh nga themelimi i tij u bë ndërmjetësi më i madh i zbritjeve në vend, tani është firma më e madhe e shërbimeve të investimeve të tregtuara në Amerikë, me afërsisht 7.8 trilion dollarë aktive të klientit.
Mashtrimi më i madh telefonik ndonjëherë
Cofield, sipas dokumenteve të gjykatës të lëshuara nga zyrtarët e qarkut dhe burgut, përdori një telefon për të imituar miliarderin Sidney Kimmel.
Kimmel, 94 vjeç, është kryetar dhe CEO i kompanisë së prodhimit Sidney Kimmel Entertainment dhe renditet në vendin e 1,905 në listën e Forbes 2023 të njerëzve më të pasur në botë.
Ai themeloi kompaninë e veshjeve Jones Group më shumë se katër dekada më parë, ajo zotëronte marka të tilla si Stuart Weitzman dhe Nine West.
Në vitin 2014, ai e shiti kompaninë për 2.2 miliardë dollarë te firma e kapitalit privat Sycamore Partners, dhe tani zotëron kompaninë e prodhimit Sidney Kimmel Entertainment, e cila prodhoi filmat “Hell or High Water”, “Crazy Rich Asian” dhe “Moneyball”.
Skema e Cofield, e cila u zhvillua midis 4 dhe 16 qershor 2020, thuhet se i mundësoi atij të përdorte telefona celularë klandestinë për të komunikuar me firmën e shërbimeve financiare Schwab dhe në këtë mënyrë të arrinte të transferonte 11 milionë dollarë në një kompani në Idaho, për të blerë 6,106 monedha ari American Eagle.
Më pas ai mori me qira një aeroplan privat për të transportuar monedhat në Atlanta dhe bleu një rezidencë prej 4.4 milionë dollarësh në Buckhead, Georgia, të gjitha nga komoditeti i telefonit në pëllëmbë të dorës së tij.
Cofield po vuante tashmë një dënim 14-vjeçar për grabitje të armatosur.
Ai tani është akuzuar për komplot pasi ka kryer mashtrime bankare dhe pastrim parash, për të cilat ai është deklaruar i pafajshëm, ndërsa autoritetet besojnë se bashkëpunëtorët Eldridge Bennett, 65 vjeç dhe vajza e tij 27-vjeçare, Eliayah, ishin përfshirë në skemë.
Siguria e transaksioneve financiare në fokus
Charles Schwab i tha Insajderit se me marrjen në dijeni për aktivitetin e dyshimtë, menjëherë janë nisur masat për të mbrojtur llogarinë e klientit dhe autoritetet janë njoftuar.
“Cofield ishte një person dinak, inteligjent që mund të të mashtrojë lehtësisht”, tha Jose Morales, drejtor i Njësisë së Menaxhimit Special, për Atlanta Journal-Constitution.
Megjithatë, ndërsa disa detaje kyçe në lidhje me vjedhjen mbeten të paqarta, si për shembull se si u vu në shënjestër Kimmel dhe sesi autori mundi të merrte telefonin, ky incident sjell në fokus çështjen e sigurisë që rrethon sistemin financiar dhe transaksionet e kryera nga distanca.
Duke jetuar në epokën e rritjes së inteligjencës artificiale, shumë kompani teknologjike, si Google, kanë krijuar tashmë aplikacione hiper-realiste që ndryshojnë timbrin e zërit tonë, duke i dhënë përdoruesit mundësinë për të imituar njerëzit e tjerë.
Madje, Tik Tok, ashtu si aplikacionet e tjera të rrjeteve sociale, është vërshuar me video të njerëzve që “mashtrojnë” miqtë dhe familjarët për argëtim, duke u shtirur si personazhe të njohur.
Këto teknologji në zhvillim janë, thonë shumë ekspertë, mjeti i përsosur për mashtrimet telefonike më efektive.
Në fillim të këtij viti, autoritetet në Kanada thanë se një burrë përdori zëra të gjeneruar nga AI, me gjasë të klonuar nga profilet e mediave sociale, për të zhvatur 200,000 dollarë nga të paktën tetë qytetarë të moshuar në vetëm tre ditë.
Mashtrime të ngjashme duke përfituar nga prindërit dhe gjyshërit po shfaqen pothuajse në çdo shtet të Amerikës. Këtë muaj, disa rrethe shkollore të Oregonit paralajmëruan prindërit për një mori thirrjesh të rreme rrëmbimesh.
Në rastin e Arthur Lee Cofield, natyrisht, gjërat u përshkallëzuan menjëherë. Por, çfarë nëse ai vetë mund të kishte në posedim, përveç telefonit kontrabandë, edhe teknologjinë që aktualisht është në ecje të plotë? Deri ku mund të shkonte mashtrimi i tij?/Albeu.com/
