Shqiponjës së Frankfurtit i mohohet kthimi në Bundesligë

Koronavirusi ka pasur ndikim edhe në maskotën më të famshme në Gjermani.

Pronarit të maskotës së Eintracht Frankfurtit, shqiponjës Attila, i është ndalur kthimi në Bundesligë, që do të vazhdojë këtë muaj.

Sipas Daily Mail, Attila zakonisht fluturon rreth stadiumit me 51 mijë ulëse, para ndeshjeve që Eintrachti i luan në shtëpi. Fluturimi i shqiponjës shërben për të ndezur atmosferën në stadium.

Por shqiponja 16-vjeçare nuk ka qenë në gjendje të përmbushë detyrat e saj të prag-ndeshjeve që nga 12 marsi, kur Eintrachti pësoi 3:0 nga Baseli.

Edhe atëherë shqiponja e famshme kishte rol të kufizuar. Ndeshja ishte luajtur pa praninë e shikuesve.

Pronarit të shqiponjës tani i është thënë se fluturimi i saj nuk do të lejohet kur Frankfurti të përballet me Gladbachun dhjetë ditë më vonë.

“Attila është mësuar me njerëzit. Ajo është e vetmuar”, ka thënë Norbert Lawitschka për Bild.

Shqiponjës i janë anuluar edhe paraqitje tjera publike, pasi ishte angazhuar për dasma, kampe të futbollit dhe nga tifozët.

“Kjo natyrisht është humbje e madhe financiare”, ka shtuar Lawitschka, që llogarit në paratë e klubit dhe bizneset tjera për të gjeneruar të ardhura.

Ai megjithatë shpreson se shqiponjës shpejtë do t’iu lejohet paraqitja në stadium. Pronari i shqiponjës vuan nga diabeti dhe për këtë paraqet rrezik të madh për prekje nga koronavirusi.