Sanchez flet hapur: Prej Mourinhos humba besimin

Në vitet e para të dekadës së fundit ai u konsiderua një nga sulmuesit më të talentuar në skenën botërore. Më pas karriera e Alexis Sanchez kaloi përmes një rënieje të ngadaltë, edhe për shkak të problemeve të shumta fizike. Sidoqoftë, lojtari i Interit ka zbuluar një nga arsyet e dështimit të tij te Manchester United, ku aventura nuk zgjati shumë.

Për mikrofonat e “BBC”, kilieni e drejtoi gishtin nga drejtimi i Josè Mourinho në stolin e “Djajve të Kuq”: “Unë i them gjërat ashtu siç janë. Për mendimin tim, Mourinho është një nga trajnerët më të mirë në botë për mënyrën se si stërvit, se si i studion ndeshjet me video dhe si kujdeset për gjërat. Por, me të trajner në “Old Trafford” një herë e gjeja veten brenda ekipit, pastaj jashtë tij.

Ndonjëherë nuk luaja, kështu që si lojtar humba besimin. Çdo futbollist e humbet besimin kur trajtohet në këtë mënyrë. Dhe më pas kishte një atmosferë, që nuk ishte e shëndetshme. Ndonjëherë luaja mirë, shënoja edhe gol, por ai më largonte nga fusha. Unë kam luajtur futboll që 5 vjeç dhe, nëse ma heq topin, e humb gëzimin”.

Vetëm pesë gola dhe nëntë asiste me fanellën e Manchester United, klub i cili verën e kaluar vendosi ta huazonte tek Interi, ku tani për tani gjërat nuk po shkojnë më mirë, për shkak të shumë dëmtimeve të pësuara në hark të sezonit aktual.