Pastore i pashpresë: Ky sezon është e pamundur të mbyllet

Lojtari i Romës, Javier Pastore, nuk është aspak optimist sa i përket rikthimit të futbollit.

Përhpaja e shpejtë dhe e madhe e koronavirusit ka bërë që thuajse të gjitha aktivitetet sportive të pezullohen për një kohë të pacaktuar.

Me Italinë si vendin më të goditur nga Covid19, edhe Serie A bën pjesë në kampionatet e suspenduara. Planifikohet që kampionati të fillojë më 3 ose 9 maj, por me situatën që po krijohet në Itali, vështirë se do të ndodh një gjë e tillë.

Kështu mendon edhe Javier Pastore, asi i Romës, i cili e sheh si të pamundur përfundimin e këtij sezoni.

“Do të shohim nëse luajmë përsëri këtë sezon, apo tjetrin. Të jem i sinqert, unë mendoj se do të jetë e pamundur të mbyllet ky sezon, pasi duhet së paku 20-30 ditë stërvitje që të jemi gati” ka thënë argjentinasi.

“Të gjithë skuadrat do të humbin para, por mendoj është e pamundur të rifillohet aty ku e kemi lënë. Do të thoshte të përfundojmë më vonë dhe më vonë, duke shtyrë kështu fillimin e kampanjës tjetër” shtoi argjentinasi.

Disa nga top pesë ligat evropiane pritej të rifillonin më 2 prill. Por, ka vende si Spanja që veçse kanë nisur valën e të prekurve dhe po iu ikën nga dora, që do të thotë se mund të shtyhet për më larg data e rifillimit.