Shuhet në moshën 80-vjeçare Vincent Pastore, ylli i serialit “The Sopranos

Vincent Pastore, aktori amerikan që u bë i njohur për publikun me personazhin Salvatore “Big Pussy” Bonpensiero në serialin e famshëm “The Sopranos”, është ndarë nga jeta në moshën 80-vjeçare.

BBC raporton se Pastore u gjet pa shenja jete në shtëpinë e tij, në lagjen Bronx të Nju Jorkut. Autoritetet nuk kanë konstatuar elemente që mund të ngrenë dyshime për një vepër penale.

Famën ndërkombëtare ai e arriti duke interpretuar Salvatore “Big Pussy” Bonpensiero, mikun e afërt të Tony Soprano-s, i cili gjatë zhvillimit të ngjarjeve nis të bashkëpunojë me FBI-në.

Eliminimi i personazhit në sezonin e dytë mbetet një prej skenave më të paharrueshme të serialit. Megjithatë, Pastore u shfaq në të gjashtë sezonet nëpërmjet skenave rikujtuese.

Menaxheri i tij, Robert Attermann, e kujtoi atë si një artist të përkushtuar dhe si një njeri zemërgjerë. “Në sytë e publikut ai do të mbetet gjithmonë ‘Big Pussy’, por për ata që e njihnin ishte shumë më tepër. Ai e donte aktrimin, respektonte kolegët dhe gjithmonë mbështeste aktorët e rinj, duke u dhënë këshilla dhe ndihmë”, tha Attermann.

Sipas menaxherit, ndarja nga jeta e Pastore përbën edhe një humbje personale për të, pasi për më shumë se tre dekada kishte ndjekur nga afër jo vetëm rrugëtimin e tij të suksesshëm profesional, por kishte njohur edhe njeriun e jashtëzakonshëm që ishte.

Pastore lindi në Bronx në vitin 1946. Përpara se të ndiqte karrierën në aktrim, ai shërbeu në Marinën Amerikane gjatë Luftës së Vietnamit.

Hapat e parë në kinematografi i hodhi me role në produksione të njohura si “Goodfellas” dhe “Carlito’s Way”. Më pas, ai u bë pjesë edhe e serialeve “Law & Order”, “General Hospital” dhe “Hawaii Five-O”.

Pavarësisht roleve të shumta, interpretimi në “The Sopranos” ishte ai që e renditi mes figurave më të njohura të televizionit amerikan.

Në vitin 2000, Pastore dhe pjesëtarët e tjerë të kastit morën çmimin Screen Actors Guild Award, duke konfirmuar suksesin e një prej serialeve më të vlerësuara në historinë e televizionit.