Neuerin nuk e mban vendi: Nuk është ky Bayerni që njoh

Manuel Neuer deklaroi në një intervistë për prestigjiozen gjemane “Bild” se ka mbetur i zhgënjyer nga fakti që nga klubi kanë rrjedhur informacione për detajet e marrëveshjes së rinovimit të kontratës, me aktualen që skadon në vitin 2021.

“Jam pak i irrituar. Jam pjesë e Bayernit prej nëntë vjetësh dhe kurrë nuk kam qenë i padrejtë me klubin. Por gjithnjë e më shumë po shfaqen detaje në media për negociatat midis drejtuesve të klubit dhe agjentit tim, informacione që jo gjithmonë korrespondojnë me realitetin. Unë nuk e kam njohur Bayernin të tillë.”

Reagimi i portierit të përfaqësueses së Gjermanisë vjen pas raportimeve në “Kicker” se ai ka kërkuar plot 20 milionë euro bruto dhe një kontratë deri në vitin 2025.

“Gjithmonë në diskutimet tona ka qenë thelbësor sinqeriti, bazuar në besimin dhe besnikërinë e ndërsjellë. Nëse disa aspekte specifike fillojnë të shfaqen në shtyp, është diçka që ndikon në imazhin tim dhe që mund të shkaktojë dëm.

E kuptoj që një kontratë e re pesëvjeçare nuk do të ishte realiste dhe në moshën time nuk e di nëse do të qëndroj në nivel të lartë deri në moshën 39-vjeçare. Ajo që dua është thjesht një marrëveshje që është e kënaqshme për të gjithë dhe për ta arritur këtë duhet që drejtuesit të pajtohen me disa kushte të caktuara. Kohëzgjatja e kontratës së trajnerit Flick është gjithashtu e rëndësishme për mua,” – tha ndër të tjera Neuer.