Mbërrin oferta zyrtare për Elseid Hysaj nga Rusia

Ofertë ruse për Elseid Hysajn. Sipas asaj që zbulon Gianluca Di Marzio, madje edhe me shifra, Spartaku i Moskës ka bërë një ofertë konkretë te Napoli për shërbimet e mbrojtësit kuqezi.

Kapiteni i kombëtares shqiptare kërkohet nga ana e klubit rus që po synon të rritet edhe në prestigj duke afruar emra të rëndësishëm, mes të cilëve dhe Hysaj.

Sipas asaj që bën të ditur Di Marzio, për 26-vjeçarin ka një ofertë prej 7 milion eurosh për Napolin, aspak e lartë, por duke marrë parasysh faktin që futbollistit i përfundon kontrata verën e ardhshme, do të ishte më mirë sesa futbollisti të largohej si lojtar i lirë.

Ndërkohë që vetë futbollistit i ofrohet dhe një kontratë 5-vjeçare, me një pagë prej 3 milion eurosh në sezon, që është jo pak joshëse dhe që mund ta bindë ndoshta Hysajn për t’u transferuar në Premier League të Rusisë.

Në startin e Serisë A, ku Napoli kryeson për shkak të golavarazhit, Hysaj ka qenë i padiskutueshëm në formacionin e Gattusos dhe madje në suksesin e fundit ndaj Genoas 6-0 dhuroi dhe një asist.

Tashmë fjala i mbetet Napolit por dhe vetë futbollistit, nëse dëshiron të pranojnë ofertën e ardhur nga Rusia.