Hamilton, mes legjendave të Formula 1

Piloti britanik gjatë vitit 2019 e siguroi titullin e gjashtë të kampionit botëror, synon rekordin e Schumacherit

Lewis Hamilton nuk njeh limite në Formula 1. 2019-shi ka qenë viti i pilotit britanik.

Ngasësi i Mercedesit gjatë vitit që e lamë pas është shpallur kampion i botës në Formula 1. 34 vjeçari me këtë rast e siguroi titullin e gjashtë në karrierë.

Ai e siguroi titullin në garën e Austinit në Shtetet e Bashkuara të Amerikës, ku i mjaftoi vendi i dytë në muajin nëntor, prapa shokut të tij të skuadrës, Valtteri Bottas.

Hamilton u ndie i lumtur për suksesin e radhës, duke e e konsideruar këtë si njërin prej sezoneve më të vështira për t’u fituar.

“Për mua, ky ishte definitivisht sezoni më i mirë në karrierë. E kam shijuar bashkëpunimin me këtë ekip të jashtëzakonshëm. Ky vit ishte fantastik. Është titulli i gjashtë, është diçka e mrekullueshme. Jam mjaft i lumtur me paraqitjet e mia këtë sezon. Bëmë gara të mëdha”, ka thënë piloti britanik.

Ai beson se mund të fitojë tituj të tjerë në këtë sport me plot adrenalinë.

Tash Hamilton është vetëm një titull larg legjendës së Formula 1, Michael Schumacher, i cili numëron 7 tituj kampioni botëror.

Megjithatë, Leëis thotë se nuk mendon për rekorde, por për suksese të njëpasnjëshme në karrierën e tij të lavdishme.

Që kur iu bashkua Mercedesit në vitin 2013, Hamilton nuk e ka fituar titullin vetëm dy herë.

Ndërkohë, skuteria gjermane e ka bërë historinë duke dhuruar kampionë në këtë sport për herë të gjashtë radhazi.

Hamilton i fitoi më shumë se gjysmën e 21 garave në vitin 2019, respektivisht 11 gara, përfshirë këtu triumfet numër 7 në Montreal dhe Hungari.

Me 413 pikë në renditjen e garuesve, ai u bë piloti që regjistron më së shumti pikë brenda një sezoni në histori të Formula 1.

Në karrierë, Hamilton i ka 88 “pole-position” dhe 84 gara të fituara.

Në vendin e dytë përfundoi shoku i skuadrës së tij, Valtteri Bottas, kurse i treti ishte garuesi i Red Bullit, Max Verstappen.