Erling Haaland pranon se ka thyer karantinën, kjo është arsyeja

Sulmuesi Erling Haland mori pjesë në një pyetësor “online” të organizuar nga tifozët e Borussias së Dortmundit.

Norvegjezi nuk hezitoi duke iu përgjigjur çdo pyetjeje. Në një kohë pandemie, tifozët e pyetën 19-vjeçarin se si po e kalonte kohën në këto momente jonormale të jetës së tij.

“Shumicën e kohës qëndroj në shtëpi. Nuk dua të rrezikoj shëndetin tim, edhe pse rastet këtu në Dortmund janë të pakta. Gjithsesi, është e rëndësishme të mos takosh askënd. Më pas në bazë të udhëzimeve të klubit shkojmë në stërvitje, ashtu të ndarë në grupe”, tha Haland.

I pyetur se çfarë konsumonte në këtë kohë karantine, norvegjezi i habiti të gjithë duke thënë se: “Mundohem të ha shëndetshëm, por nuk mund t’i rezistoj gjatë një pice me kebap, për të cilën ndonjëherë e kam thyer edhe karantinën. Darkave kur luaj FIFA me shokët e tjerë të skuadrës më pëlqen ta shkel pak dietën. Me kë luaj më shumë? Me Tomas Delanein, unë dhe ai flasim të njëjtën gjuhë dhe kjo na ka lidhur më shumë me njëri-tjetrin”.