Duka i vë pikën: Sezoni të mbyllet, nëse nuk rifillon deri në 1 qershor

Presidenti i FSHF-së, Armando Duka është shprehur se do të ishte mirë që kampionati të riniste para qerhsorit, pasi nëse nuk ndodhë një gjë e tillë do ishte mirë të mbyllej kampionati.

Në një intervistë për “Klan TV”, Duka, thekson se federata i ka të gjitha planet, pavarësisht se çfarë do që të ndodhë me futbollin.

“E mira do ishte të rinisim stërvitjen të paktën deri më 20 maj, për të pasur më shumë kohë për lojtarët. Ne kishim një plan që të nisnim stërvitjen më 2 maj dhe kampionatin më 20 maj, por për këtë as nuk morëm asnjë përgjigje. Ne i kemi planet çfarë do që të ndodhë, është menduar edhe eliminimi i Kupës dhe në rast se kjo ndodh do të shkojnë 4 vendet e para në kampionat në Kupat e Europës.

E mira është që ne të fillojmë deri në fillim të qershorit, por nëse nuk fillojmë deri në 1 qershor, më mirë të themi stop. I bie të bëjmë ndeshje çdo 48 orë. Është thuajse kot. E mira është që të kemi filluar deri në fillim të qershorit dhe ekipet tona të jenë të përgatitura për ndeshjet e Kupave të Europës në gusht.

Skuadra e zemrës? E kam thënë gjithmonë që jam simpatizant i Vllaznisë.

Në Shqipëri nëse shikojmë skuadrat dhe lojtarët që kanë, do thonim se Kukësi duhet të jetë në vend të parë, pasi ka lojtarët më të paguar në Shqipëri, por është 9 pikë pas Tiranës.”, u shpreh Duka.