“Bëmë një hap përpara”, trajneri i Barcelonës flet pas eliminimit nga Kupa e Mbretit

Trajneri Quique Setien thotë se Barcelona bëri një hap përpara kundër Athletic Bilbaos mbrëmjen e djeshme, kur u eliminua nga Kupa e Mbretit, duke humbur 1-0 në fazën çerekfinale.

Inaki Williams shënoi një gol me kokë në momentet e fundit të ndeshjes që po zhvillohej në stadiumin “San Mames”, duke e eliminuar Barcelonën nga Kupa e Mbretit.

Që kur Setien ka marrë postin e trajnerit, Barcelona për pak sa nuk u mposht nga Ibiza, ka humbur kundër Valencias dhe mbrëmë u mund nga Bilbao.

Mirëpo tekniku Setien u shpreh i sigurt se skuadra po përmirësohet.

“Duke e marrë parasysh se çfarë na ka ndodhur në ndeshjet e tjera si mysafirë, ne bëmë një hap përpara në aspektin se si duhet të përmirësohemi”, tha Setien.

“Është e njëjta si gjithmonë; ka ditë kur ke vetëm një rast dhe shënon dhe ka ditë kur ke dhjetë raste dhe s’mund të shënosh. Nuk ka sqarim. Unë s’di se cilin duhet të fajësoj. Goli i tyre erdhi nga një aksion që nuk ishte i rrezikshëm. Ka disa gjëra që s’mund të kontrollohen dhe kjo është njëra ndër to. Gjithçka shkoi mirë, përveç rezultatit. Jam i lumtur me punën e skuadrës”, përfundoi tekniku i Barcelonës.