Vendi pa Gjykatën Kushtetuese, Meta: Jam i pakënaqur nga Rama

Gjykata Kushtetuese vazhdon prej tre vitesh të jetë institucioni që nuk është në funksion të plotë dhe kjo duket se do të na shoqërojë dhe deri në fillimin e vitit të ardhshëm zgjedhor.

Presidenti Ilir Meta i pyetur për situatën e krijuar në Gjykatën Kushtetuese ashtu si dhe për situatën e shkaktuar me emigrantët në kufirin shqiptaro-grek ka fajësuar qeverinë, kryeministrin Edi Rama.

Gjatë konferencës për shtyp, Kreu i Shtetit deklaroi se nëse do të ishin ndjekur hapat e ndërmarrë nga Presidenti që para 3 vitesh, Shqipëria nuk do të ishte asnjë orë pa Gjykatë Kushtetuese.

“Kam zero koment për Gjykatën Kushtetuese. Nëse do ishin ndjekur hapat e ndërmarrë nga Presidenti që para 3 vitesh, Shqipëria nuk do të ishte asnjë orë pa këtë gjykatë. Nuk është më kjo çështja imediate. Imediate sot është shëndeti I njerëzve, sepse kjo situatë mund të vazhdojë gjatë. Kam bërë çdo përpjekje për të bashkëpunuar me qeverinë dhe çdo institucion tjetër që kjo sfidë e madhe e Covid-19 të ketë sa më pak kosto për shqiptarët. Për Kushtetutën kemi 3 vjet që flasim, padyshim jemi këtu, sepse jemi sjellë në mënyrë të papërgjegjshme me Kushtetutën e Shqipërisë që nga viti 2008”, tha Meta.

Kreu i shtetit tha se nuk ka asnjë koment për vendimin e Këshillit të Emërimeve në Drejtësi për të ndaluar kandidimin e gjyqtares Regleta Panajoti në Gjykatën Kushtetuese.

Presidenti gjithashtu u shpreh se ka pasur rezervat e tij në lidhje me ndryshimet kushtetuese që u miratuan në mënyrë të njëanshme nga mazhoranca.