Si shpëtoi gjallë nga atentati Ardjan Çapja: Autori tentoi t’a qëllonte për herë të dytë

Ardjan Çapja mëngjesin e djeshëm u qëllua me plumb në shpatullën e majtë, shumë pranë zemrës, ndërkohë aktualisht ndodhet në Spitalin e Traumës.

Ngjarja ndodhi në Elbasan, ku atentatori, nga brenda mjetit tip “Volkswagen” qëlloi në drejtim të Çapjas.

Sipas informacioneve të fundit, qitja është bërë nga pjesa e pasme e shoferit.

Dyshimet e policisë përforcohen edhe nga mbajtësja e snajperit model finlandez, e fiksuar brenda mjetit që vetëm pak minuta pas ngjarjes, u dogj në lagjen “Skënderbej”, në zonën e njohur si Fushë-Mbret, 6 km larg banesës së Çapjas.

Brenda kësaj makine, policia mundi të sekuestrojë armën me të cilën u bë qitja dhe një silenciator të çmontuar.

Raportohet se kur makina është përfshirë nga flakët, një plumb i dytë i dalë nga snajperi plagosi në këmbë një zjarrfikës 38-vjeçar në vendngjarje.

Policia bën me dije se autori e ka mbushur armën për të qëlluar për herë të dytë në drejtim të objektivit të tij, mirëpo kjo gjë nuk ndodhi pasi Çapja është rrëzuar përtokë që në goditjen e parë nga snajperi.

Kësisoj ai i shpëtoi një plumbi të dytë që mund të kishte qenë vrastar për të.

Paraprakisht, në krim mendohet të kenë vepruar të paktën 3 persona.

Dy prej tyre kanë qenë atentatori dhe drejtuesi i mjetit ndërsa i treti i ka ndihmuar autorët të largohen nga Fushë-Mbreti, pasi dogjën mjetin me targa të vjedhura, shkruan “abcnews.al”.

Për shkak se numri i shasisë së Volkswagen-it nuk rezulton i regjistruar në territorin shqiptar, policia i ka dërguar letërporosi autoriteteve në Kosovë e Maqedoni, nga ku dyshohet të jetë trafikuar kjo makinë.p