Sërish rritje, këto janë të dhënat e fundit nga viktimat e COVID-19 në 24 orët e fundit

Italia ka pësuar një rritje në bilancin ditor nga koronavirusi. Mësohet se në 24 orët e fundit janë regjistruar 534 viktima, 80 më shumë se dje ku u shënuan 454.

Italia kishte 3 ditë që nuk e kalonte shifrën 500 në bilancin ditor për viktimat nga koronavirusi. Por pavarësisht kësaj rritjeje, duket se vendi fqinj e ka kaluar më të keqen e kësaj pandemie, e cila i ka marrë jetën 24,648 italianëve.

Një rritje e lehtë vëzhgohet edhe në numrin e rasteve të reja. Në 24 orët e fundit janë shënuar 2,729, rreth 500 raste më shumë se dje.

Që nga shpërthimi i koronavirusit, në Itali janë regjistruar 183,957 raste infektimi. Mbi 51 mijë persona në vendin fqinj kanë arritur ta mposhtin COVID-19. Mbi 107 mijë raste janë ende aktive në vend, ndërsa 2,471 persona ndodhen në gjendje të rëndë për jetën.

Pavarësisht shifrave ende të larta, Italia është e vendosur të kalojë në fazën e dytë të pandemisë koronavirus. Kryeministri, Giuseppe Conte prezantoi në parlament masat e reja sa i përket frenimit të pandemisë.

“Qeveria ka përgatitur një strategji me pesë pika, sa i përket përgjigjes shëndetësore. E para është respektimi i distancimit social, përdorimi i pajisjeve mbrojtëse individuale deri në gjetjen e një terapie apo vaksine”, tha ai.

Më shumë se 2,5 milionë njerëz nga e gjithë bota janë prekur nga koronavirusi, ndërsa mbi 174 mijë persona kanë humbur jetën.