Performanca më e ulët që prej vitit 1997 në Dogana, gati 4 miliardë lekë rënie

Të fokusuar pas ngjarjeve politike dhe pasojave të tërmetit të 26 nentorit opinionit i kanë shpëtuar financat publike. Sot invalidët nuk kanë marrë shperblimet e tyre prej dy muajsh.

Stafet e universiteteve gjithashtu. A tregon kjo për mungesë financash? Po t’i hedhim një sy të ardhurave të realizuara nga doganat shqiptare ç’ka thamë më sipër merr kuptim.

Të ardhurat e realizuara nga doganat për dy muajt e fundit të vitit që sapo u mbyll shënojnë respektivisht 87% realizim të planit prej 15,200 milionë lekë për muajin nëntor nga të cilat u mblodhën vetëm 13, 221 milionë lekë dhe 89% realizim të planit prej 16,681 milionë lekë për muajin dhjetor nga të cilat u mblodhën vetëm 14, 840 milionë lekë.

Në total, 3.6 miliardë lekë më pak se planifikimi për këto dy muaj, 3.6 miliardë lekë të munguar në buxhetin e shtetit. Thënë ndryshe, këto janë shifrat më të ulëta të realizimit të të ardhurave duke mos konsideruar vitin e mbrapshtë 1997.

Çfare po ndodh me doganat shqiptare? Çfare ka ndodhur që shqiptarët konsumojnë 80 ton më pak karburant në dy mujorin nëntor-dhjetor, që duke marrë parasysh trendin historik duhet të jetë periudhë me rritje?

Si shpjegohet që referuar buletinit fiskal të drejtorisë së përgjithshme të doganave, në nëntor shqiptaret konsumojnë 30 ton më pak cigare apo në vitin 2019 konsumojnë mbi 1000 ton kafe më pak?

A ka ndonjë shpjegim për rënien e të ardhurave nga tvsh në 500 milionë apo nga të ardhurat nga akciza rreth 1 miliardë krahasuar me të njëjtën periudhë të vitit të kaluar?

Nga një analizë e indikatorëve ekonomikë nuk ka shkaqe të arsyeshme që shqiptarët të kenë ulur konsumin e kafesë apo që në një kohë kur rafineria e Ballshit ka që në shtator që nuk punon të bjerë importi i karburanteve. Menaxhimi i dobët dhe kontrabanda janë arsyet e vetme të qenësishme.