Meta reagon pas protestës së maturantëve: Edhe zëri i vetëm i një maturanti duhet dëgjuar

“Edhe zëri i vetëm i një maturanti duhet dëgjuar, vlerësuar dhe sqaruar për paqartësitë dhe vështirësitë që ka hasur në këtë kohë pandemie”

Presidenti i Republikës, Ilir Meta, ka reaguar pas protestës së maturantëve.

Presidenti Meta tha se po i ndjek me vëmendje shqetësimet e ngritura prej tyre dhe njëkohësisht u bëri thirrje autoriteteve përkatëse që t’i japë zgjidhje problemeve që kanë ngritur maturantët pas provimit në Gjuhë-Letërsi.

Reagimi i plotë i Presidentit Ilir Meta:

“Po ndjek me shqetësim protestën e maturantëve dhe kërkesat e tyre ndaj autoriteteve përgjegjëse”.

“I bëj thirrje Komitetit të Maturës Shtetërore që në përmbushje të detyrimit ligjor dhe përballë kërkesave të studentëve, në transparencë të plotë, të marrë sa më parë në shqyrtim të gjitha shqetësimet e tyre dhe t’u përgjigjet me përgjegjësi të plotë”.

“Edhe zëri i vetëm i një maturanti duhet dëgjuar, vlerësuar dhe sqaruar për paqartësitë dhe vështirësitë që ka hasur në këtë kohë pandemie”.

“Viti që kaloi ka qenë shumë i vështirë për të gjithë sistemin arsimor, por në mënyrë të veçantë për maturantët tanë”

“Provimi i Maturës Shtetërore të shërbejë si një vlerësim i drejtë i dijeve të tyre në kohë të vështira, dhe jo si një ndëshkim ndaj pamundësisë objektive të studentëve dhe kufizimeve të pamerituara për arritjen e rezultateve të kërkuara!”