Koronavirusi: Instituti i farmaceutikës në Itali jep OK për testimin e ilaçit japonez

Ministri italian i Shëndetësisë, Roberto Speranza, tha se AIFA ka rënë dakord për testimin e ilaçit japonez kundër gripit, i cili në disa vende ka dhënë disa rezultate pozitive te pacientët me koronavirus që nuk janë në gjendje kritike.

Kërkesa për testimin e këtij ilaçi nisi nga Presidenti i rajonit Veneto, Luca Zaia, “për të studiuar efektivitetin e tij kundër koronavirus”, si dhe u pasua nga rajoni i Piemontes që po ashtu kishte shprehur interes për ta vlerësuar mundësinë e testimit të këtij ilaçi.

“Menaxheri i përgjithshëm i Aifa, Nicola Magrini, më njoftoi se mbledhja e Komitetit Teknik-Shkencor këtë mëngjes, pas një analize fillestare të të dhënave në dispozicion që kanë të bëjnë me ‘Avigan’, është duke zhvilluar një program eksperimentimi dhe kërkimi për të vlerësuar ndikimin e ilaçit në fazat e para të sëmundjes”, tha ministri. “Në ditët në vijim, protokollet do të bëhen funksionalë, siç ka ndodhur tashmë për testimet e tjera që janë në vazhdim”.

Franco Locatelli, presidenti i Këshillit të Lartë të Shëndetit, bëri thirrje për kujdes. “Një gjë janë opsionet që duhet të testohen dhe vërtetohen, dhe eksperimentet janë të mirëseardhura, por është krejt tjetër të përcaktohen disa mundësi terapeutike si zgjidhje për një problem kaq të rëndësishëm si Covid-19.

Para se të vazhdojmë të themi se kemi gjetur zgjidhje përfundimtare, duhen prova të pakundërshtueshme. Në rastin e këtij ilaçi specifik deri më tani ne nuk kemi asnjë provë të saktë dhe të pakundërshtueshme”, shtoi ai. “Për këtë arsye unë rekomandoj kujdes dhe maturi, në mënyrë që të mos gjenerojmë shpresa që mund të zhgënjehen dhe zhgënjehen”.

Edhe “FUJIFILM Toyama Chemical”, e cila prodhon ilaçin, gjithashtu sqaroi se ky ilaç aktualisht po administrohet tek pacientët e Covid-19 në Japoni për një studim vëzhgues të kryer nga institucionet mjekësore.

“Ne gjithashtu e dimë që ‘Favipiravir’ (versioni gjenerik i ‘Avigan’) është administruar te pacientët me Covid-19 në Kinë. Fujifilm nuk ka luajtur ndonjë rol në hulumtimin e mësipërm dhe për këtë arsye nuk është në gjendje të komentojë këto rezultate.

Aktualisht nuk ka prova shkencore klinike publike për të vërtetuar efikasitetin dhe sigurinë e Avigan kundër Covid-19 në pacientë. Për të vlerësuar efikasitetin dhe sigurinë e tij kundër Covid-19, Fujifilm planifikon të nisë një testim klinik në Japoni”.