OFL postblloqe në gjithë vendin, në mbrëmje kontrolle të shumta në Shkodër

Policia e Shkodrës ka vijuar mbrëmjen e sotme kontrolle të rrepta ndaj mjeteve luksoze.

Forcat e FNSH dhe Forcat e rendit janë vendosur në hyrje të Shkodrës, duke kontrolluar mjete pa dokumentacionin përkatës dhe kontrolle ndaj personave të shpallur në kërkim që lëvizin në Shkodër.

Ende nuk ka të dhëna mbi rezultatet e deritanishme.

Gjatë ditëve të fundit, operacioni ka vijuar në qarqet e tjera.

Ndalimi i makinave bëhet në rastet kur kanë parregullsi me dokumentacionit apo kur i gjenden sende të jashtëligjshme. Në rastet kur ka mangësi në dokumentacion automjeti bllokohet dhe dokumentacioni I kalon Operacionit Forca e Ligjit.

Qindra automjete luksoze prodhime të viteve 2015-2020 u janë nënshtruar kontrolleve nga Tirana, Durrësi, Korça, Vlora, Elbasani, Berati e Fieri përgjatë 48 orëve. Nga këto automjete, raportohet se 37 janë bllokuar dhe janë shoqëruar 134 persona.

Bëhet fjalë për automjete të blerja me vlerë nga 40-250 mijë euro secila.

Leja e qarkullimit, akti i pronësisë, numri i shasisë dhe modifikimet janë disa nga kontrollet që forcat e policisë kryejnë për çdo automjet.

Një makinë luksoze, tip Hummer është ndaluar në Kukës gjatë kontrolleve të policisë të zhvilluara ditën e sotme.