Durrës, Lulëzim Cuku e vrau bashkëshorten në sy të vajzës 10- vjeçare

Lulëzim Cuku e vrau bashkëshorten e tij, Manjolën në sy të fëmijëve.

Konflikti mes tyre përfundoi tragjikisht mbrëmjen e së shtunës, me vdekjen e 33- vjeçares, e cila la pas tre fëmijë të vegjël jetimë, një vajzë 10 vjeçe, një tjetër 7 vjeçe dhe djalin vetëm 2 vjeç.

Largësia kishte bërë punën e vet dhe Lulëzimi kishte nisur të dyshonte për nderin e bashkëshortes së tij.

Madje, ai ka thënë se këtë radhë ishte kthyer nga Greqia pasi kishte dëgjuar thashetheme nga më të ndryshmet, që kishin të bënin me nderin e së shoqes, raporton Panorama.

Mësohet se gjatë muajve të fundit, Lulëzimi ishte bërë shumë agresiv ndaj së shoqes, këtë e konfirmojnë edhe fëmijët e çiftit, kryesisht vajza e madhe 10-vjeçare.

Ajo ka thënë se prindërit e saj debatonin shpesh dhe shumë ashpër me njëri-tjetrin.

Lulëzimi dyshonte se ndërkohë që ai jetonte në Greqi, ajo kishte lidhje intime me persona të tjerë, madje edhe i fuste në shtëpinë e tyre.

Ky fakt e ka acaruar shumë Lulëzimin, i cili mbrëmjen e së shtunës, në gjaknxehtësi e sipër, e qëlloi Manjolën tri herë më thikë duke e lënë të vdekur në vend.

Burime policore bënë me dije se Manjola dyshohet se i ka kthyer fjalën burrit dhe kjo ka shkaktuar përshkallëzimin e sherrit, që u mbyll me një të vdekur.

Të afërmit e çiftit kanë marrë fëmijët dhe trupin e Manjola Cukut dhe kanë mbyllur shtëpinë. Ceremonia mortore e 33-vjeçares që mbeti e vrarë do të zhvillohet në vendlindje, në Peshkopi.