Del dëshmia e 32-vjeçares që braktisi foshnjën në kazan: E linda të vdekur e s’kisha lek për funeral

Policia e Tiranës ka arritur të identifikojë brenda pak kohe nënën e foshnjes së gjetur të pajetë në një kosh mbeturinash në lagjen Ali Demi.

Sipas policisë nëna është 32-vjeçarja me iniciale H.M banuese në Gjirokastër.

Ajo është shoqëruar në ambientet e Komisariatit Nr.1 për veprime të mëtejshme.

Njoftimi i policisë:

“Në vijim të informacionit paraprak të dhënë se në lagjen “Ali Demi”, mbrapa ish-markatës së vjetër, në koshin e mbeturinave është gjetur pa shenja jete një foshnje i gjinisë mashkullore ju bëjmë me dije se:

Nga tërësia e veprimeve hetimore u bë i mundur identifikimi si dhe shoqerimi në ambientet e Komisariatit të Policisë Nr.1, i shtetases H.M.,32 vjeçe, banuese në Gjirokastër, për veprime të metejshme hetimore.

Nën drejtimin e Prokurorisë vijon puna për zbardhjen e plotë të rrethanave të ngjarjes”, njofton policia.

32-vjeçarja ka deklaruar se e ka lindur foshnjen në muajin e 7 të shtatzënisë të vdekur.

E ëma ka deklaruar në polici se nuk kishte para për të paguar funeralin, prandaj ka vendosur që ta hedhë tek koshi i mbeturinave.

Grupi hetimor dhe shërbimet e Policisë ndodhen në vendngjarje dhe vijojnë punën për zbardhjen e plotë të rrethanave të ngjarjes, identifikimin dhe shoqërimin e shtetasit/es që ka hedhur në kosh foshnjën.