CEZ: Balla kërkon përjashtimin e gjyqtares, ka miqësi me Berishën

Kreu i grupit parlamentar të PS-së, Taulant Balla ka kërkuar përjashtimin e gjyqtares Fatmira Hajdari, nga gjykimi i padisë së Kuvendit për privatizimin e CEZ-it.

Balla i është drejtuar me një kërkesë Gjykatës së Tiranës, me anë të së cilës kërkon që Fatmira Hajdari të mos jetë pjesë e trupës së gjyqtarëve. Sipas Ballës, gjyqtarja ajo ka miqësi familjare me ish-kryeministrin Sali Berisha dhe familjarët e tij.

“Kuvendi me fletë-thirrjen e ardhur me datë 29.05.2020, njoftohet për shqyrtimin e ankimit në Gjykatën e Apelit Tiranë, në dhomë këshillimi në datë 03.06.2010, me trupë gjykuese të përbërë nga gjyqtarët Fatmira Hajdari dhe Alaudin Malaj.

Gjyqtaria Fatmira Hajdari e cila është caktuar si anëtare e trupës gjyqësore që do të shqyrtojë ankimin e depozituar nga Kuvendi, ndodhet në kushtet e parashikuara nga neni 17 pika 1 shkronja “ë” të Kodit të Procedurës Penale, pasi ekzistojnë shkaqe të rëndësishme njëanshmërie. Gjyqtaria Fatmira Hajdari ka miqësi familjare me ish kryeministrin Sali Berisha dhe familjaret e tij, fakt ky i njohur botërisht.

Në kushtet kur kallëzimi i Kuvendit implikon shtetasit Shkelzen Berisha dhe Sali Berisha për lidhje me shtetasin Ndue Kalaj i dyshuar për ushtrimi i ndikimit të paligjshëm ndaj personave që ushtrojnë funksione publike, pjesëmarrja e gjyqtares Fatmira Hajdari në shqyrtimin e ankimit të depozituar nga Kuvendi, duke qenë së ka miqësi të afërt më familjen Berisha, përbën shkak për njëanshmëri në shqyrtimin e çështjes”, thuhet në kërkesën e Ballës.