Zhvillime të reja nga Holanda, vendimi për anulimin e sezonit drejt tërheqjes

Vendimi për anulimin e sezonit 2019/20 të Erevidisie nuk është pritur mirë nga shumica e klubeve, raportojnë mediat e ndryshme ndërkombëtare, prandaj dhe Federata Holandeze e Futbollit po mendon tërheqjen nga ky vendim.

Në fakt një nga zërat më të fortë kundër këtij vendimi ishte ai i Henk de Jong, trajneri i skuadrës së Kamburit që operon në kategorinë e 2-të dhe që udhëhiqte me 11 pikë diferencë. Nisur nga fakti që ngjitjen në kategorinë e parë sezonin e ardhshëm e kishte thuajse të sigurt, De Jong kritikoi mjaft ashpër vendimin duke u shprehur se ky vendim ishte më i turpshmi në historinë e futbollit.

Raportimet shkojnë më tej duke sqaruar se edhe klube të tjera kanë dalë kundër vendimit, si për shembull Uillem II që është shumë afër arritjes së një vendi në Ligën e Europës.

Një tjetër deklaratë e fortë kundër vendimit ka ardhur nga një politikan holandez. Mark Boumans, i cili tha: “Mendoj se mund të tërhiqet vendimi. Në rast se më shumë se gjysma e klubeve janë kundër, atëherë është e mundur tërheqja nga vendimmarrja kaotike e kësaj jave.”