Sëmundja e rëndë i merr jetën shkrimtarit dhe studiuesit të njohur shqiptar (FOTO LAJM)

Ndahet nga jeta në moshën 71-vjeçare Moikom Zeqo, i cilësuar si një ndër zërat e më të rëndësishëm të kulturës sonë kombëtare.

Prej kohësh vuante nga një sëmundje e rëndë (leucemi akute) dhe ishte nën kurim të vazhdueshëm.

Moikom Zeqo (Durrës, 3 qershor 1949-15 qershor 2020 Tiranë) kreu studimet e larta në degën e Gjuhë-Letërsisë në Tiranë. Fillimisht punoi si redaktor letrar në gazetën “Drita”.

Më pas poezitë e tij diktohen për hermetizëm nga udhëheqja e Kohës, dhe dërgohet që të punojë si mësues në Rrogozhinë. Për të vijuar më pas 1979-1987 punë në Muzeun Arkeologjik të Durrësit, e më tej si specialist në sektorin e artit antik në Akademinë e Shkencave në Tiranë.

Është autor i 100 librave, në poezi, prozë, eseistikë dhe publicistikë. Veprat e tij janë përkthyer më disa gjuhë të huaja, anglisht, esperanto, gjermanisht etj.

Në fillim të viteve ’90, qe pjesë e grupit organizator të Kongresit të 10-të të Partisë së Punës.

Më 1991 u emërua kryetar i Komitetit të Kulturës dhe po atë vit iu dha portofoli i ministrit të Kulturës, Rinisë dhe Sporteve. Më 1991 u zgjodh deputet i PS dhe shërbeu deri më 1996. Më pas shkëputet nga politika, dhe zgjidhet drejtor në Muzeun Kombëtar, duke mos reshtur se qeni kritikë ndaj çështjeve të ndryshme politike, deri në ditët e fundi të jetës së tij. Mban Urdhrin e Lartë “Mjeshtër i Madh” dhe “Gjergj Kastriot Skënderbeu”.