QSUT infekton Shqipërinë, preken mjekë, infermierë dhe pacientë (VIDEO)

Sot për të tretën ditë radhazi, vendi ynë ka shënuar një rritje të ndjeshme të të prekurve me koroavirus.

Një prej vatrave më “të nxehta” vijon të jetë Qendra Spitalore Universitare “Nënë Tereza” në Tiranë.

Ditën e sotme, nga 44 raste të reja, 9 vinin nga radhët e bluzave të bardha të prekur nga Sars CoV 2 ndërsa ABC Neës mësoi se ato ndodhen në QSUT.

Mjeku infeksionist Pëllumb Pipero rendit faktorët që mendon se kanë ndikuar në këtë situatë.

“Nëse ka një protokoll ai nuk është respektuar. Duke filluar nga veshjet mbrojtëse, maskat, higjiena, kontakti. Ka caluar, do thoja që ka qenë defektoze respektimi i masave nga ana e bluzave të bardha. Nuk flas dot tani, është e rëndësishme të bëhen analizat dhe të dalin konkluzionet se rasti po hetohet. Unë nuk besoj se ky është justifikim, nuk të detyron askush të hysh në spital pa maskë. Unë e mendoj përgjegjësi personale”, është shprehur mjeku.

Autoritetet nuk kanë deklaruar numrin e saktë të personelit shëndetësor me koronavirus, por burimet thanë për ABC News se të paktën në 6 shërbime spitalore, ka persona të infektuar.

Bëhet fjalë për Kardiologjinë, Hematologjinë, Gastrohepatologjinë, Urgjencën, Pediatrinë dhe Mjekësinë Interne.

Ndërkohë pacientët e infektuar me koronavirus në spital e kanë çuar atë në të paktën 4 qytete. Në Lushnje, në Gjirokastër, në Burrel dhe në Librazhd.

Përhapja e koronavirusit nga spitalet nuk ka ndodhur vetëm në Shqipëri, por ndryshe Italia p.sh e cila u përball me këtë situatë në fillim të pandemisë, në vendin tonë ndodhi atëherë kur autoritetet shëndetësore deklaruan se situatën e kishin nën kontroll.