Njëri me heshtje e tjetri me sulm të drejtpërdrejtë, si “plasi” mes Mira Kazhanit dhe Blendi Fevziut

Gjatë një interviste në “Ora 19” në Syri TV, Blendi Fevziu komentoi pa përmendur emra punësimin në UKT të Mira Kazhanit dhe Bieta Sulos.

“Shpeshherë shumë analistë ftohen në debate jo për të dhënë mendim të paanshëm, por për të dhënë mendim të anshëm. Pra, për të artikuluar në mënyrë pak më interesante atë që politikanët e artikulojnë në mënyrë më të ngurtë. Në gjykimin tim është absolutisht e papranueshme, jashtë çdo standardi që dikush të paguhet në një strukturë tjetër, qoftë politike ose jo, dhe të ruajë më pas edhe staturën e gazetarit. Kush merret me gazetari le të qëndrojë brenda gazetarisë. Unë e di që ka gazetarë që bëjnë dy-tre punë, por bëjnë dy-tre punë brenda profilit të tyre. Një punë që bie ndesh me punën që ai bën sigurisht që është e papranueshme.” – u shpreh Fevziu.

Pikërisht për këtë reagim Kazhani u shpreh në një post në Instagram:

“Këto ditë pandemie me dy gjëra janë argëtuar shqiptarët: Rroga ime si punë e dytë shteti dhe vila 5 milionë euro e Fevziut ku ai poston në Instagram luksin e tij. Me rrogën time mund ta shtysh muajin, por me miliardat e Fevziut gjithë jetën e tij në shërbim të pushtetit, politikanë e oligarkë, shqiptarët mund të shikojnë atë çfarë është vërtet korrupsion në shtypin shqiptar. Dhe të vjen neveri kur për rrogën time bëhet gjyq nga Fevziu, kurse për miliardat e Fevziut nga pushtetet bëhen emisione suksesi. Sa për mua, unë kam bërë vërtet një gabim, etik, për të cilin po pendohem mirë.”

Pas këtij posti, Blendi Fevziu ka zgjedhur që të heshtë ndërsa ka shpërndarë në Instagram Story gjithë çfarë kishte shkruar kolegia. /albeu.cop/