Vjosa Osmani: Shpresoj ende në një marrëveshje LDK-VV

Nënkryetarja e Lidhjes Demokratike të Kosovës, Vjosa Osmani është deklaruar sot për media në lidhje me situatën politike në vend. Ajo ka thënë se LDK ende është e interesuar që në një periudhë të shkurtër të bëhet marrëveshja me Lëvizjen Vetëvendosje.

“Jemi të interesuar që në një periudhë të shkurtër të bëhet marrëveshja. Duhet të shfrytëzohet koha e mbetur dhe ne jemi të interesuar që t’i kthehemi tavolinës së bisedimeve”, ka thënë ajo, transmeton IndeksOnline.

Osmani pavarësisht shpresës që do të arrihet koalicioni, thotë se propozimet e LDK-së janë korrekte dhe synim kanë tejkalimin e ngërçit politik.

E pyetur për vizitat e shpeshta të ambasadorëve të huaj në zyrat e LDK-së ajo thotë se ato janë krejtësisht normale dhe nuk janë trysni ndaj askujt, por janë takime të zakonshme.

“Ambasadorët e huaj po informohen nga ne për zhvillimet në parti. Natyrisht qe japin rekomandime, por në asnjë moment nuk bëjnë trysni. Shtëpia nuk mund të mbahet pa miq. I mirëpresim vizitat e miqve dhe ato nuk i shohim si trysni”, ka deklaruar ajo.

Sipas Osmanit, në LDK ka vullnet të plotë për marrëveshje dhe se nuk është koha për skenarë tjera.

“Çështjet e tilla duhet të diskutohen dhe të propozohen në tavolinën e negociatave. Është e nevojshme të kemi respekt të ndërsjellët”, ka thënë ajo.