Përplasje në Kuvend mes PDK-së dhe LDK-së për votimin e marrëveshjeve ndërkombëtare

Deputetët e Partisë Demokratike të Kosovës (PDK) dhe të Lidhjes Demokratike të Kosovës (LDK), janë përplasur në lidhje me votimin apo mos votimin e marrëveshjeve ndërkombëtare.

Deputeti i Partisë Demokratike të Kosovës (PDK), Memli Krasniqi akuzoi LDK-në duke ju thënë se dy vite më parë nuk i kanë përkrahur marrëveshjet e tilla, me arsyen se ish- kryetari i Kuvendit të Kosovës, Kadri Veseli nuk është sjellë mirë karshi deputetëve të LDK-së.

“Arsyetimi i parë ka qenë që nuk po sillet mirë kryetari i Kuvendit dhe s’po i votojmë marrëveshjet ndërkombëtare. As marrëveshjet e fondit IPA nuk donit t’i votonit”, iu tha Krasniqi deputetëve të LDK-së.

Sipas tij, është e drejtë e secilës parti politike të votoj ose jo në Kuvendin e Kosovës.

“Mos votimi juaj, ka qenë e drejt e votimit tuaj politik në të drejtën e juaj, dhe ky është veprimi jonë politik në të drejtën tonë”, tha tutje ai.

Ndërsa, kryeministri i Qeverisë së Kosovës, Avdullah Hoti reagoi duke thënë se asnjë marrëveshje në mandatin e kaluar nuk ka mbetur pa u votuar për shkak të mungesës së votave të opozitës.

“Mund të diskutojmë sa të doni, por e vërteta është se asnjë marrëveshje në mandatin e kaluar nuk ka mbetur pa u votuar për shak të mungesës së votave për shkak të opozitës, është e vërtetë apo?”, tha Hoti.

Në lidhje me këtë pati reagime edhe nga deputetja e PDK-së, Blerta Deliu e cila tha se LDK-ja ishte ajo që mandatin e kaluar i ka bllokuar marrëveshjet ndërkombëtare.

Ndërkaq, edhe deputeti i LDK-së Arben Gashi, u shpreh se nëse kinse LDK-ja paska vepruar në atë mënyrë siç po shprehen deputetët e PDK-së, a duhet edhe PDK-ja të gaboj për votimin e këtyre marrëveshjeve.

“Po e marrim që ne kemi gabu, a po doni dhe ju me gabu? Në kulmin e krizës ekonomike, ju po doni me ia ndal Kosovës në këtë kohë pandemie? Nëse ju mendoni që këto marrëveshje janë të këqija, dilni e thoni popullit…”, theksoi Gashi.