50 ditë nga rasti i parë me koronavirus, Kurti: Rreziku nuk ka kaluar ende

Kryeministri, Albin Kurti, ka thënë se sot janë bërë 50 ditë nga rasti i parë i virusit Corona në Kosovë.

Kurti ka falenderuar të gjithë kontributdhënësit që kanë ndikuar që të normalizohet gjendja në Kosovë.

Ai ka thënë se kjo erdhi edhe falë masave të marra më 15 prill.

“Duke ju falenderuar Ministrisë së Shëndetësisë, Institutit Kombëtar të Shëndetësisë Publike, forcave policore, dhe të gjithë mjekëve, infermierëve, dhe vullnetarëve, gjendja epidemiologjike në Kosovë ka filluar të normalizohet, sidomos për shkak të vënies së masave më të fundit parandaluese të 15 prillit.

Edhe pse më shumë teste janë duke u administruar javët e fundit, gjithnjë e më pak qytetarë po rezultojnë të infektuar me virusin Corona. Kemi më pak raste të infektimeve, më shumë raste të shërimeve, dhe si rezultat, numri i rasteve aktive ka marrë kahje të dëshiruar.

Si gjithnjë, vazhdojmë me kujdes dhe pa panik. Rreziku nuk ka kaluar ende. Por falë bashkëpunimit të të gjithëve, jemi në gjendje që të nisim lehtësimin gradual të masave në fuqi. Ju lumtë!”, tha ai.