Suno AI shpallet fajtore nga një gjykatë gjermane për cenimin e të drejtave të autorit

Një gjykatë në Mynih ka shpallur fajtore Suno AI, kompaninë që krijon muzikë me inteligjencë artificiale, për shkeljen e të drejtave të autorit. Vendimi vlerësohet se mund të shërbejë si precedent edhe në arenën ndërkombëtare.

Çështja gjyqësore u iniciua nga GEMA, organizata gjermane për administrimin e të drejtave të autorit, e cila ka një rol të ngjashëm me atë të SIAE-s në Itali. Presidenti i GEMA-s, Tobias Holzmueller, e përshkroi rezultatin si një “vendim me rëndësi globale”, për shkak të ndikimit që mund të ketë në trajnimin e ardhshëm të modeleve të inteligjencës artificiale.

Gjykata përcaktoi se Suno AI duhet të bëjë publike të ardhurat e siguruara dhe të paguajë dëmshpërblim për autorët, krijimet e të cilëve janë shfrytëzuar pa autorizim. Pretendimet ndaj kompanisë mbështeten në akuzën se ajo ka përdorur në shkallë të gjerë muzikë të mbrojtur nga e drejta e autorit për trajnimin e modeleve të saj të inteligjencës artificiale.

Gjatë procesit, GEMA deklaroi se Suno AI prodhon këngë në përputhje me kërkesat e përdoruesve për zhanre, stile ose atmosfera të veçanta, duke u mbështetur te hite të njohura ndërkombëtare. Mes shembujve të përmendur ishin “Mambo No. 5” e Lou Bega, “Daddy Cool” e Boney M. dhe “Forever Young” e Alphaville. Në padi pretendohet se materialet e krijuara nga inteligjenca artificiale kanë ngjashmëri shumë të madhe me këngët origjinale.

Holzmueller sqaroi se GEMA nuk synon ta detyrojë Suno AI të mbyllet. Sipas tij, objektivi është të krijohen mundësi për negociata mes palëve në kushte të barabarta, gjë që deri tani nuk ka qenë e realizueshme. Në qendër të debatit vazhdon të jetë forma e kompensimit të autorëve, kur veprat e tyre shërbejnë për trajnimin e inteligjencës artificiale.

Për GEMA-n, ky nuk është rasti i parë i fituar në gjykatë kundër një kompanie të inteligjencës artificiale. Edhe vitin e kaluar, organizata fitoi në Mynih një proces ndaj OpenAI, të cilën e akuzoi se kishte riprodhuar në mënyrë të paligjshme tekste këngësh. OpenAI e ka ankimuar vendimin, ndaj çështja vijon të jetë nën shqyrtim.

Martin Senftleben, ekspert i pronësisë intelektuale në Universitetin e Amsterdamit, deklaroi për Deutsche Welle se rëndësia e këtij procesi lidhet gjithashtu me palën që e ka ngritur padinë. Ai theksoi se veprimi ligjor nuk është ndërmarrë nga një kompani private, por nga një organizatë kolektive që përfaqëson autorët. Sipas Senftleben, kjo i jep padisë më shumë forcë dhe shtrirje, sepse ajo mbron si artistët e njohur, ashtu edhe krijuesit që kanë më pak famë.