Vendim me jehonë ndërkombëtare, Suno AI shpallet fajtore në Gjermani për shkelje të të drejtave të autorit

Një gjykatë në Mynih ka vendosur kundër Suno AI, kompanisë që përdor inteligjencën artificiale për krijimin e muzikës, duke e dënuar për shkelje të të drejtave të autorit. Vendimi pritet të ketë ndikim edhe përtej Gjermanisë dhe mund të shërbejë si precedent ndërkombëtar.

Gjykata ka urdhëruar kompaninë të bëjë publike të ardhurat e siguruara dhe të dëmshpërblejë autorët, krijimet e të cilëve janë përdorur pa autorizim. Në qendër të akuzave qëndron përdorimi në shkallë të gjerë i muzikës së mbrojtur nga e drejta e autorit për trajnimin e modeleve të inteligjencës artificiale të Suno AI.

Padia u paraqit nga GEMA, organizata gjermane për administrimin e të drejtave të autorit, e cila ka një rol të ngjashëm me SIAE-n në Itali. Presidenti i GEMA-s, Tobias Holzmueller, e përshkroi vendimin si një “verdict me rëndësi globale”, duke vënë në dukje se ai mund të ndikojë në rregullat dhe praktikat e ardhshme të trajnimit të modeleve të inteligjencës artificiale.

Holzmueller sqaroi se GEMA nuk synon mbylljen e Suno AI. Sipas tij, qëllimi është vendosja e një baze që do t’u mundësonte palëve të zhvillonin negociata të barabarta, gjë që deri tani nuk ka ndodhur. Çështja kryesore lidhet me mënyrën e kompensimit të autorëve kur veprat e tyre përdoren për trajnimin e sistemeve të inteligjencës artificiale.

Në argumentet e paraqitura para gjykatës, GEMA tha se Suno AI prodhon këngë bazuar në kërkesat e përdoruesve për një zhanër, stil apo atmosferë specifike. Për këtë proces, sipas organizatës, janë përdorur si referencë hite ndërkombëtare, mes tyre “Mambo No. 5” e Lou Bega, “Daddy Cool” e Boney M. dhe “Forever Young” e Alphaville. Padia pretendon se këngët e krijuara nga sistemi ngjajnë shumë me versionet origjinale.

GEMA ka fituar edhe më parë një proces kundër një kompanie të inteligjencës artificiale. Vitin e kaluar, në Mynih, ajo triumfoi në çështjen ndaj OpenAI, të cilën e akuzoi për riprodhim të paligjshëm të teksteve të këngëve. OpenAI e ka apeluar vendimin, ndërsa procedura vijon të jetë në shqyrtim.

Martin Senftleben, ekspert i pronësisë intelektuale në Universitetin e Amsterdamit, deklaroi për Deutsche Welle se pesha e kësaj çështjeje lidhet edhe me faktin që paditëse është një organizatë kolektive që përfaqëson autorët dhe jo një kompani private. Sipas tij, kjo e forcon dhe e zgjeron veprimin ligjor, pasi përfshin në mbrojtje jo vetëm artistët e njohur, por edhe krijuesit më pak të famshëm.