Sony do të heqë dorë nga disqet fizike për lojërat e reja të PlayStation

Sony ka njoftuar se, duke nisur nga janari i vitit 2028, lojërat e reja për “PlayStation” nuk do të publikohen më në disqe fizike. Ky vendim shënon një lëvizje të rëndësishme të kompanisë drejt një modeli tërësisht digjital në sektorin e lojërave, transmeton Anadolu.

Sipas një njoftimi të publikuar në blogun e kompanisë, titujt e rinj do të vijojnë të shiten edhe përmes dyqaneve me pakicë, por paketimet fizike nuk do të përmbajnë më disqe. Në vend të tyre, blerësit do të marrin kode për shkarkimin digjital të lojës. Sony e lidhi këtë ndryshim me evolucionin e preferencave të konsumatorëve dhe me zhvillimet e përgjithshme në industrinë e argëtimit.

“Ndërsa preferencat e konsumatorëve dhe industria e argëtimit në përgjithësi vazhdojnë të largohen nga disqet fizike drejt formatit digjital, ky është një drejtim i natyrshëm për ‘Sony Interactive Entertainment’ që të përshtatet me këto prirje”, deklaroi kompania.

Vendimi u bë publik pak ditë pasi Rockstar Games njoftoi se edhe Grand Theft Auto VI, një prej lojërave më të shumëpritura, do të lançohet pa disk fizik. Kjo shihet si një tjetër tregues i ritmit të shpejtë me të cilin industria po kalon drejt shpërndarjes digjitale.

Disa përfaqësues të industrisë dhe operatorë të shitjeve me pakicë e kanë kundërshtuar këtë qasje, duke paralajmëruar se ajo mund të cenojë të drejtat e konsumatorëve dhe ta bëjë aksesin te lojërat më të vështirë.

Vikki Blake, gazetare e industrisë së lojërave, e cilësoi këtë zhvillim si “një goditje e rëndë ndaj të drejtave të konsumatorëve”. Sipas saj, lojtarët do ta kenë më të vështirë të huazojnë, shkëmbejnë apo rishesin lojërat, ndërsa mund të shfaqen probleme edhe në lidhje me ruajtjen e tyre.

Christopher Dring, redaktor i “The Game Business”, tha se njoftimi ishte i papritur, edhe pse shkarkimet digjitale janë bërë mënyra kryesore me të cilën përdoruesit e “PlayStation” blejnë lojëra. “Ne ende shohim miliona e miliona lojëra në PlayStation që shiten në format fizik”, u shpreh ai, duke theksuar se ndryshimi mund të jetë veçanërisht i vështirë për shitësit që varen ende nga shitjet fizike.

Kritikave iu bashkua edhe shitësi i pavarur amerikan Lootbox Gaming, i cili e përshkroi vendimin si “një sulm” ndaj lojtarëve, koleksionistëve dhe gjithë industrisë së shitjes së lojërave.

Sony sqaroi se vendimi nuk do të prekë titujt që janë publikuar përpara janarit 2028.

Njoftimi vjen ndërsa kompania po përballet me reagime negative edhe për mënyrën se si menaxhon përmbajtjen digjitale. Sony ka konfirmuar se mbi 500 filma dhe seriale televizive të blera përmes “PlayStation Store” do të largohen nga bibliotekat e përdoruesve, pas përfundimit të një marrëveshjeje licencimi me “StudioCanal”.

Deri tani, Sony nuk ka treguar nëse do të krijojë një mekanizëm që u mundëson përdoruesve të transferojnë pronësinë e lojërave të blera në format digjital.